Аҟәа. Абҵарамза 24, 2023 шықәса. Аԥсныпресс /Алеқсеи Шамба/. Аԥсны ажурналистцәа рыбжьара арҿиаратә конкурс «Взгляд - 2023» аихшьаалақәа ҟарҵеит ахәаша, абҵарамза 24 рзы С.Ҷанба ихьӡ зху Аԥснытәи адраматә театр аҿы.
Аноминациа «Иреиӷьу аналитикатә, аинформациатә, апублицистикатә статиа» аҿы аиааира игеит Бадрак Аҩӡба.
Аноминациа «Иреиӷьу аочерк» аҿы аиааира лгеит Асмаҭ Ҵәџьба, аҩбатәи аҭыԥ аанылкылеит Диана Папба, ахԥатәи аҭыԥ – Бадри Есиава.
Аноминациа «Ақьыԥхьтә мамзаргьы аелектронтә ҭыжьымҭа аҿы иреиӷьу арепортаж» аҿы актәи аҭыԥ аанылкылеит Рада Чачаа, аҩбатәи – Асида Малиа, ахԥатәи– Дариа Архипова.
Аноминациа «Иреиӷьу аинтервиу» аҿы актәи аҭыԥ аанылкылеит Лиана Ебжьноу, аҩбатәи – Наала Мықәба, ахԥатәи – Викториа Думаа.
Аноминациа «Иреиӷьу афоторепортаж» аҿы аиааира лгеит Ельза Ҷанба.
Аԥсны-урыстәылатәи аусеицура аобласт аҿы апрофессионалтә журналистика иреиӷьу атрадициақәа рыхьчареи аҟазареи рзы Иҷыдоу адиплом ранашьахеит Екатерина Бебиеи Лилиана Иаковлевеи. Аиааира згаз зегьы аҳамҭатә сертификатқәа ранашьахеит.
2023 шықәсазы имҩаԥысыз аконкурс Аԥсны Афырхаҵа, аҳҭнықалақь Аҟәа ахақәиҭтәраан иҭахаз ТАСС арратә фотокорреспондент Андреи Соловиов игәалашәара иазкын. Аусмҩаԥгатә алахәылацәеи асасцәеи иара изкыз адокументалтә фильм ацыԥҵәаха дырбан, атеатр азал маҷ афоие аҿы арратә корреспондент иԥсы анҭаз иҟаиҵаз акадрқәа урыхаԥшыр ҟалон.
Аҳамҭақәа ранашьара ахь ииасаанӡа Аԥсны иҟоу Урыстәыла аус ацуразы Ахаҭарнакра анапхгаҩы Дмитри Федотов, аиааира згаз зегьы русумҭақәа сынтәа, ԥхынҷкәынмзазы, Москва ақалақь аҿы имҩаԥысраны иҟоу аконкурс «Честный взгляд» шорт-бӷьыц иалагалахоит, актәии аҩбатәи аҭыԥқәа аанызкылаз уи аихшьаалақәа рыҟаҵара ахьымҩаԥысуа Урыстәыла аҳҭнықалақь ахь ицараты алшара рзаԥҵахоит ҳәа иазгәеиҭеит.
Аԥсны иҟоу Урыстәыла ацҳаражәҳәаҩ Михаил Шургалин Аԥсны Андреи Соловиов игәалашәара шаҟа игәцаракны иазнеиуа џьашьахәыс икуп ҳәа иазгәеиҭеит.
Аинформациатә Маҵзура ТАСС адиректор Хада Андреи Кондрашовгьы Аԥсны аҭоурыхи уи афырхацәеи ҳаҭыр дула иазнеиуеит ҳәа иазгәеиҭеит.
«ТАСС акорреспондент, 30 шықәса раԥхьа иахьа ҳахьыҟоу аҭыԥ иацәыхарамкәа иҭахаз, Аԥсны Афырхаҵа ҳәа ахьӡ зауз ҳҩыза Андреи Соловиов абас ҳаҭыр дула дахьыжәгәалашәо азы идуӡӡаны иҭабуп ҳәа шәаҳҳәоит», - ҳәа иҳәеит иара.
«Арратә корреспондентцәеи ажурналистцәеи – ари жәлар рдипломатиа акыр иазааигәоу аус назыгӡо уаауп. Ажурналистцәа иахьыҟазаалакгьы есымша аидгылара аадырԥшуазароуп», - ҳәа иажәа иациҵеит «Аԥсны аҭынчра адгылара аҭара» азы ареспублика атәылахьчара Аминистрра амедал занаршьаз Андреи Кондрашов.
Аԥсны ажурналистцәа Реидгыла ахантәаҩы Руслан Ҳашыг, Аԥсны жәлар Рџьынџьтәылатәи еибашьра ашьҭыхь урыстәылатәи ажурналистцәа аԥснытәи рколлегацәа рыцны аполитикцәа идырҿиоз аинформациатә блокада қәҿиарала иаҿагылон ҳәа иазгәеиҭеит. Иара иҳәеит даара иара изы ишгәырӷьара дуу арҭ аимадарақәа иахьа уажәраанӡагьы азанааҭтә ҩаӡара адагьы ауаҩытәыҩсатә еимадара аҩаӡараҿгьы еиқәырханы иахьыҟоу.
Аԥсны аминистрцәа Реилазаара Аппарат анапхгаҩы ихаҭыԥуаҩ Кристиан Бжьаниа аконкурс зымҩаԥгара традициала ишьақәгылоу усмҩаԥгатәны ишыҟало азы агәыӷра шимоу, насгьы ахәҭакахьала иара иганахьала ганрацәала адгылара шыҟало азы еизаз агәра диргеит.
Ажиури ахантәаҩы, Sputnik Аԥсны ашеф-редактор Дмитри Нездоровин аконкурс зхы алазырхәыз зегьы иҭабуп ҳәа раҳәо, аиааира згаз ралкаара акыр ишыуадаҩыз, аусумҭақәа зегьы иҷыдоу автортә ҟазшьа шалукаауаз атәы азгәеиҭеит.
Аконкурс аԥшьгаҩцәа – Аԥсны иҟоу Урыстәыла аус ацуразы Ахаҭарнакра, Аԥсны иҟоу Урыстәылатәи Афедерациа Ацҳаажәҳәарҭа, акультура Аминистрра, ареспублика ажурналистцәа Реидгыла.
