Аҟәа. Жьҭаарамза 27, 2023 шықәса. Аԥсныпресс. Жьҭаарамза 30 рзы имҩаԥысуеит Аԥсны анаукақәа Ракадемиа апрезидент иалхра.
Аԥсны Анаукақәа Ракадемиа Аԥҟаԥҵәа инақәыршәаны, акандидатура ақәыргылара мҩаԥысуеит апрезидиум инарҭбаау аилатәара аҿы, алхрақәа ракәзар, урҭ Академиа азеиԥш еизараҿы имҩаԥысуеит.
Анаукақәа Ракадемиа апрезидент хәы-шықәса аҽҳәара иманы далххоит.
Жьҭаарамза 25 рзы имҩаԥысит Анаукақәа Ракадемиа апрезидиум инарҭбаау аилатәара. Уи уажәы аус зуа Академиа апрезидент изинмчы ахьхыркәшахо инамаданы, Анаукақәа Ракадемиа апрезидент имаҵураҭыԥ ахь акандидатура ақәыргылара иазкын.
Аԥсны анаукақәа Ракадемиа апрезидент иалхразы акомиссиа ахь апретендент заҵәык изы мацара аусшәҟәқәа нагахеит, уи Аԥсны анаукақәа Ракадемиа академик, Урыстәылатәи анаукақәа Ракадемиа аҳәаанырцәтәи алахәыла, афилологиатә наукақәа рдоктор, Аԥсны анаукақәа Ракадемиа уажәтәи апрезидент Зураб Џьоҭа-иԥа Џьапуа иоуп. Анаукақәа Ракадемиа алахәылацәа еицҿакны Зураб Џьапуа икандидатура азы рыбжьы рҭиит. Абжьыҭира маӡала имҩаԥган.
Аҩбатәи амшхәаԥштә зҵаарагьы убаҵәҟьа маӡалатәи абжьыҭирахь инаган.
Апрезидиум аӡбамҭала азиндырратә наукақәа ркандидат, Георги Николаи-иԥа Колбаиа «Аԥсны Анаукақәа Ракадемиа Ҳаҭыр зқәу адоктор» ҳәа ахьӡ ихҵоуп.
Анаҩс апрезидиум алахәылацәа анаукақәа Ракадемиа апрезидент иалхра иазкны азеиԥш еизара амҩаԥгара арыцхә шьақәдыргылеит. Уи мҩаԥысуеит жьҭаарамза 30, 2023 шықәсазы Аԥсны анаукақәа Ракадемиа Аботаникатә Институт аконференц-зал аҿы, асааҭ 12:00 рзы.
Абри азы адырра ҟанаҵоит Аԥсны анаукақәа Ракадемиа апресс-маҵзура.
