Аҟәа. Жьҭаарамаза 23, 2023 шықәса. Аԥсныпресс. 2014 шықәса инаркны 150 тонн инареиҳаны агуманитартә еидара Аԥснынтәи ДЖәР, ЛЖәР рахь анагара алыршан. Абри азы ашәахьа, жьҭаарамза 23 рзы имҩаԥысыз апресс-конференциа аҿы адырра ҟаиҵеит Урыстәылатәи Афедерациа арегион ҿыцқәа аус рыцуразы Аԥсны Аҳәынҭқарра Ахада Ихаҭарнак ҷыдас Иҷыдоу аҭагылазаашьақәа рзы Аминистрра ахада Лев Кәыҵниа.
Апресс-конференциа зхы алазырхәыз Аԥсны адәныҟатәи аусқәа рминистр ихаҭыԥуаҩ Иракли Ҭыжәба, Аԥсны Урыстәылатәи Афедерациа иҿыцу арегионқәа – Донецктәи Жәлартә Республикеи Лугансктәи Жәлартә Республикеи Запорожтәии Херсонтәи аобластқәеи аус рыцура азҵаара аҵак ҷыда арҭоит ҳәа инаҵшьны иазгәеиҭеит.
«Ҳреспубликақәа рыбжьара аусеицуреи аимадареи акыр аамҭа раахыс аиҩызаратә ҟазшьа рыманы иҟоуп. Лев Кәыҵниа напхгара зиҭо Иҷыдоу аҭагылазаашьақәа рзы Ҳминистрра акәзар, абар ашықәсқәа инеиԥынкыланы иарбоу арегионқәа излауо ала ацхыраара рыҭара еиҿнакаауеит», – ҳәа иҳәеит Константин Ҭыжәба.
Иҿыцу амаҵураҭыԥ азы акәзар, Константин Ҭыжәба иҳәеит:
«Ари акыр иҳараку амаҵураҭыԥ ауп, аминистр иҿаԥхьа иҿыцу ахыдҵақәа ргылахоит. Хымԥада еилкаатәуп, арегионқәа рҿы аибашьратә хҭысқәа шцо, убри аҟнытә уаҟа ирацәаны аинформациа аларҵәара рҽацәырыхьчоит. Иҿыцу астатус аҟны иҷыдоу аҭагылазаашьақәа рзы аминистр иконтактқәа еиҳа аҽарҭбаауеит, уи еиҳа аинформациа аиуразы алшара иоуеит. Ҳара ҳакәзар, адәныҟатәи аусқәа Рминистрра аганахьала, иарбоу аусура аганахьала уи ацхыраара иаҳҭалоит», – ҳәа иҳәеит Константин Ҭыжәба.
Ахәҭакахьала, Лев Кәыҵниа иарабоу ахырхарҭала аусура хымԥада ишацҵахо, насгьы хара имгакәа арҭ арегионқәа рахь агуманитартә цхыраара изаамҭанытәиу апартиа, аӡрыжәтәгьы уахь иналаҵаны, ишнагахо азгәеиҭеит.
«Ашықәс Ҿыц аламҭалазы ҳара иарбоу арегионқәа рахь агуманитартә еидара – аӡрыжәтә, амандарина, уҳәа иҳалшо зегьы анагара азԥхьагәаҭаны иҳамоуп», – ҳәа иҳәеит Лев Кәыҵниа.
