Аҟәа. Цәыббрамза 18, 2023 шықәса. Аԥнсыпресс. Аԥсны аҩныҵҟатәи аусқәа Рминистрра ашьаусԥшааратә Усбарҭа аусзуҩцәа ашьжьымҭан, цәыббрамза 18 рзы Каман ақыҭа азааигәара дааныркылеит уаанӡа Аамҭалатәи аусеилыргаанӡатәи аԥхьакырҭа аҟынтәи дахьыбналаз азы зыԥшаара иаҿыз, Аҟәа араион Иашҭхәа ақыҭан инхо Гурген Киракосиан. 

Уаанӡа иҟаз адыррақәа рыла, нанҳәамза 13 рзы 1988 шықәсазы ииз Киракосиан Гурген Арменак-иԥа Аԥсны Ашьауӷатә Закәанеидкыла ахәҭаҷ 99 ахәҭа 1 (Ауаҩшьра), иара убас ахәҭаҷ 217 ахәҭа 1 (иҭҟьо амцабџьар изакәанымкәа аҵәахреи аныҟәгареи) инарықәыршәаны  ахара идҵан. Уи ахьырхәра аҳасабала ирӷәӷәоу арежим змоу акалониа аҿы  15 шықәса ҭакрала ахгара иқәҵан.