Иури Хагәышь иажәақәа рыла, аҽныҵәҟьа иаԥҵан аоперативтә штаб аԥсабаратә рыцҳара аҧыхразы, убри инаҷыданы акомиссиа, анхарҭатә ҭыԥқәа ироуыз аԥхасҭа ахәшьара азҭо, уи иалахәхеит араион ахадацәа рхаҭыҧуаа, ақыҭақәа русбарҭақәа рхадацәа, араионтә еизара адепутатцәа. Акомиссиа ҩнаҭацыҧхьаӡа агәаҭарақәа мҩаԥнагеит, аматериалтә цхырааразы иахәҭоу аԥара шьақәнаргылеит. Администрациаҟны атәылауаа рҟынтә арзаҳалқәа рыдкылара иалагеит. Ахәаҧшразы ирыдкылан арзаҳалқәа 467, урҭ рахьтә 447 ақәшаҳаҭра роуит. Арзаҳалқәа 20 акомиссиа изахымсӡеит, урҭ асасааирҭатә ҩнқәа акоммерциатә усура мҩаԥызго ҳәа иԥхьаӡан азы. Иара убас, арзаҳалқәа 16, Аԥсны атәылауаҩра змамыз рҟынтә иалаҵан, урҭ ахарџь хазы ирзоужьхоит.
Аҳәынҭқарра Ахада иазгәеиҭеит, араион анаплакҩцәа ацхыраара ду шыҟарҵаз, иҷыдоу ахыԥхьаӡаларҭа иаларҵеит 15 млн.мааҭ а)ара. Арҭ аԥарақәа аԥхасҭа зауз аҭаацәара аматериалтә цхыраара иазырхан. Ҩымчыбжьа ирылагӡаны 8,5 млн.мааҭ рызшәахоит.
«Аԥсны зегьы фымцамчла еиқәзыршәо 220 кВ амчра змоу афымца мҩанызго ацәаҳәақәа хԥа ҳахьчарц ҳҭахуп. Кәыдры иааиԥмырҟьаӡакәа аусурақәа цоит. Ҳазхәаԥшыз аканал аҵыхәтәантәи аӡхыҵра иҟалаз иацәнахьчеит Аӡҩыбжьеи Уарчеи.
Иара убас аусура мҩаԥаҳгароуп Маҷара аӡиас аҟны. 6,5 млн мааҭ ахьарбоу ахарџьынҵатә документациа хиоуп. Уажәы акомиссиа азыӡба аднакылеит арҭ аусурақәа рымҩаԥгаразы, аусура мҩаԥызго аиҿкаара жәамш рыҩныҵҟала аусура нап адыркуеит. Уи иагоит зымчыбжьаҟа», -ҳәеит Темыр Агрба.
Абри инаҷыданы, уи иажәақәа рыла, Кацыиқыҭ аусура иаларгоуп ацҳа ҿыц; Шәкәырча маҷ аҟны Ахада ирезервтә фонд аҟнытә «Аԥсныԥшаҳәахьчара» амчала аиҭашьақәыргылара мҩаԥысуеит аҳаиртә баӷәазахь ицо амҩала иҟоу ацҳа. Хымчыбжьа-мызкы аҩныҵҟала ара аусурақәа хыркәшахоит.
Аԥыза-министра афинансқәа рминистр Владимир Делба дырра ҟаиҵеит иахьазы Ацхыраагӡатә фонд аҟнытә хархәара шамоу 358 млн мааҭ , ашықәс нҵәаанӡа иаанхаз аицҵалыҵ иартәоит 142 млн мааҭ. «Аԥсабаратә рыцҳара разԥхьагәаҭареи раԥыхреи рзы иныхуп 211 млн мааҭ, ари Ацхыраагӡатә фонд азеиԥш еицҵалыҵ аҟнытә процентла иартәоит 60%», - иаҵшьны иҳәеит иара.
Ахада и-Резервтә фонд аҟнытә аԥара аиҳарк асоциалтә проблемақәа – аҵара, АҶ раԥыхра ашҟа ицоит, Аԥыза-министр Александр Анқәаб иазгәеиҭеит Ахада и-Резервтә фонд акыр ишацҵатәу, зегьы ианреиҵаха 10-150 млн мааҭ рҟынӡа.
Аилацәажәара хыркәшо, Аҳәынҭқарра Ахада дасу инапы иану ахырхарҭақәа рыла анапынҵақәа риҭеит. Иара убас аҳәынҭқарра Ахада аилацәажаәара иалахәыз иҭабуп ҳәа реиҳәеит имҩаԥыргаз аусуразы: «Шәаргьы саргьы ҳҿаԥхьа уснагӡатәны иҟоуп ҳтәылауаа рымаҵ аура, еиҳаракгьы абас еиԥш иҟоу аҭагылазаашьаақәа раан. Ари азнеишьа иашоуп. Гагра араион Администрациа аколлектив, иара убас ауааԥсыра ирымоу апроблемақәа рыӡбара знапы алаку зегьы иҭабуп ҳәа сызрашәҳә», - иҳәеит Аҳәынҭқарра Ахада.
Аилацәажаәара иалахәын аԥыза-министр Алеқсандр Анқәаб, афинансқәа рминистр Владимир Делба, аҷыдалкаатә ҭагылазаашьақәа рзы аминистр Лев Кәыҵниа, Шьаҭанкылатәи аргылара аусбарҭа аиҳабы Ҭемыр Агрба, араионтә администрациақәа рхадацәа.
