Ареспубликатә Унитартә Наплакы «Амшынеиқәафымцамч» анапхгараҭара инацҵаны звольтҳараку афымцамҩангагақәа рыргылара азы аӡбамҭа аднакылеит. Иара убас ишьақәыргылан иҿыцу аҩкаагақәа ҩба.

«Аамҭа кьаҿ иалагӡаны, жәа-мш ирылагӡаны ҩ-километр рҟынӡа инаӡо наҟ-ааҟтәи ахырхарҭа змоу афымцамҩангага ргылахеит. Ишьақәыргылан 72 шьаҟа. Аҩ-цәаҳәак роужьҭратә лшара – 10 МВт иназыцҵоу амчхара аԥнаҵоит. Астанцеиҵа амчхара  - 20 МВт ыҟоуп», –  ҳәа еиҭеиҳәеит Аспар Коӷониа. 

Уи иажәақәа рыла, ауааԥсыра иаларҵаз азыҳәамҭақәа шьаҿа-шьаҿала анагӡара мҩаԥысуеит, урҭ  шьҭарнахыс «Ареспубликатә Унитартә Наплакы «Амшынеиқәафымцамч» ацәаҳәақәа иҿыцу  аобиектқәа раҿакра азы атехниатә ҭагылазаашьақәа роуеит.

Иара убас, Аспар Коӷониа ишеиҭеиҳәаз ала, Пицунда ақалақьи Алаҳаӡы ақыҭеи рҿы иҟоу асасааирҭақәа, асасааирҭа маҷқәа, идуу ахәаахәҭратә обиектқәа рзы ишьақәыргылан  191 цыра инарзынаԥшуа афымца ахархәаразы аԥхьаӡагатә  приборқәа.