Аҟәа. Рашәарамза 22, 2023 шықәса. Аԥсныпресс. Рашәарамза 22 рзы, Аҟәа ақалақь аҿы иалагеит аӡиудо азы “Аиааира Ахраҿа” агаразы XV жәларбжьаратәи аицлабрақәа.
1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра иазку атурнир аартра иазкыз аныҳәатә церемониа рхы аладырхәит аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба, аҿари аспорти русқәа рзы Аусбарҭа аиҳабы Ельза Ҳагба, Аԥсны аӡиудо Афедерациа апрезидент Михаил Чалмаз.
Аԥсны аҿари аспорти русқәа рзы Аҳәынҭқарратә Еилакы иҟанаҵо адыррақәа рыла, атурнир рхы аладырхәуеит Аԥсны, Белорус, Урыстәыла (Ареспубликақәа Адыгеиа, Башкортосҭан, Ингушетиа, Саха-Иакутиа; Камчаттәи, Краснодартәи, Пермтәи, Ставропольтәи атәылаҿацәқәа, Архангельтәи, Ростовтәи, Самаратәи, Челиабинсктәи аобластқәа) рҟынтәи 15 командак реилазаараҿы иҟоу 330-ҩык аспортсменцәа. Аицлабрақәа 2007-2009, 2010-2011, 2012-2013, 2014-2015 шш. рзы ииз арԥарцәеи аҭыԥҳацәеи рыбжьара имҩаԥысуеит.
Хымш ирылагӡаны дара зегьы рылшарақәеи рдыррақәеи аадырԥшлоит, жәларбжьаратәи аолимпиатә категориа аӡбаҩ Миагзум Алимов (ақ.Москва, 5-тәи адан) ихантәаҩрала ззанааҭтә дырра ҳараку аӡбаҩцәа доусы рыкапантә категориақәа рҿы зегьы иреиӷьу ралкаара нарыгӡоит.
