Аԥсны аҭынчрашьақәыргыларатә операциа 1994 шықәса инаркны 2008 шықәсанӡа имҩаԥысуан. Урыстәылатәи аҭынчраԥҵаҩцәа аԥсуа-қырҭуатә еиҿагылара азона иалагалан рашәарамза  21, 1994 шықәсазы. Уи лаҵарамза  14, 1994 шықәсазы  «Аибашьра аанкылареи арратә мчқәа реидыгареи рзы» Москва  ақалақь аҿы знапаҵыҩра мҩаԥгаз Аиқәшаҳаҭра инақәыршәаны иҟалеит. Аиқәшаҳаҭра аԥсуа-қырҭуа еиҿагылара азона аҿы аҭынчра ашьақәыргылара азы Ихьыԥшым Аҳәынҭқаррақәа Реиҩызара  Аколлективтә мчрақәа раԥҵара азԥхьагәанаҭон. Аха аҭынчшьақәыргыларатә усура ауадаҩра зегьы 14 шықәса ирылагӡаны Урыстәылатәи Афедерациа аруаа ракәын иназыгӡоз.

Аиҿагылара азона аҿы аҭынчра ашьақәыргылара азы Ихьыԥшым Аҳәынҭқаррақәа Реиҩызара  Аколлективтә мчрақәа Ихьыԥшым Аҳәынҭқаррақәа Реиҩызара иалоу аҳәынҭқаррақәа  рхадацәа Рхеилак амандат инақәыршәаны абжьаҟазаратә миссиа нарыгӡон.

Урҭ еиҿагыло аганқәа реидыгара ацәаҳәа зегьы иахьаҵанакуа игылан, зоура 85 километр рҟынӡа инаӡо, зыҭбаара -  24 километр инаӡо Аԥсни Қырҭтәылеи ирыбжьоу аҳәынҭқарратә ҳәаа ахылаԥшра нарыгӡон. Аԥсны абжьаҟазаҩцәа (аҭынчраԥҵаҩцәа) ртәарҭа Қырҭтәыла иаԥну Гал араион аҿы иалхын. 

Аҭынчрашьақәыргыларатә операциа амҩаԥгара аамҭа иалагӡаны аконфликт азона аҿы иҭахеит 117-ҩык урыстәылатәи аруаа. Аиҿагылара азона аҿы аҭынчра ашьақәыргылара азы Ихьыԥшым Аҳәынҭқаррақәа Реиҩызара  Аколлективтә мчрақәа рыштаб ахьыҟаз, Москватәи  арратә округ асанаториа «Аҟәа» аҵакыраҿы иҭахаз зегьы рыхьӡқәа згәылԥҟоу амемориалтә хаҳә шьақәыргылоуп.

Урыстәылатәи абжьаҟазаҩцәа Аԥсны ралгара хацыркын жьҭаарамза 20, 2008 шықәсазы Урыстәылатәи Афедерциа ала Аԥсны Аҳәынҭқарра ахьыԥшымра азхаҵара аныҟала ашьҭахь.

Жәиԥшьықәса ирылагӡаны Аԥсны имҩаԥысуаз аҭынчшьақәгыларатә миссиа зынӡа рхы аладырхәит   70 нызықь ҩык ауаа, урҭ рхыԥхьаӡараҿы иҟоуп Урыстәыла Аҳаир-десанттә архәҭақәа, Арра-Ҳаиртә мчқәеи Арра-Мшынтә Флоти рыруааи аҳақьымцәеи атәылауаҩратә специалистцәеи.  2,5 нызықьҩык урыстәылатәи аҭынчраԥҵаҩцәа аҳәынҭқарратә ҳамҭақәа ранашьахеит.