Аслан Бжьаниа Урыстәылеи Аԥсни шәышықәсала ишьақәгылоз аиҩызареи агәылеимабзиареи шьаҭас измоу иҷыдоу аизыҟазаашьақәа шрыбжьоу азгәеиҭеит, урҭ аԥхьаҟагьы аидгылара ҟазшьа рыманы ишыҿиало азы агәыӷра шимоу иҳәеит.
Иахьа Урыстәылатәи Афедерациеи Аԥсны Аҳәынҭқарреи рҳәынҭқаррабжьаратәи аизыҟазаашьақәа аиҩызареи астратегиатә партниорреи рыла ишьаҭаркны аҿиара иаҿуп. Хра аманы иҿиоит аполитикатә диалог, атәылахьчаратә, адәныҟаекономикатә, асоциал-еономикатә, акультуратә усхкқәа рҿы аусеицура.
Нанҳәамза 26, 2008 шықәсазы Урыстәылатәи Афедерациа Ахада Дмитри Медведев Аԥсны Аҳәынҭқарра азхаҵара азы Аусԥҟа инапы аҵаиҩит. Иарбоу Аусԥҟа анапаҵыҩрала, Урыстәыла Аԥсны ахьыԥшымреи уи ҭынчмҩала аҿиареи рзы ахәдықәҵара ахахьы иагеит. Иара убри ашықәсан, цәыббрамза 9 рзы аҳәынҭқаррақәа рыбжьара адипломатиатә еизыҟазаашьақәа шьақәгылеит.
«Урыстәылатәи Афедерациеи Аԥсны Аҳәынҭқарреи аиҩызареи аусеицуреи аицхыраареи рзы Аиқәшаҳаҭра» цәыббрамза 17, 2008 шықәсазы рнапы аҵарҩит Аҳәынҭқарра Ахадацәа Дмитри Медведеви Сергеи Багаԥшьи.
Абҵарамза 24, 2014 шықәсазы Урыстәылеи Аԥсни Рхадацәа Владимир Путини Рауль Ҳаџьымбеи асоциалтә, аекономикатә, агуманитартә усхкқәа рҿы, иара убас адәныҟатәи аполитикеи атәылахьчареи ашәарҭадареи рҿы шьаҿа-шьаҿала аусеицура аҳәаақәа рырҭбаара азԥхьагәазҭо аиқәшаҳаҭра рнапы аҵарҩит.
Зынӡа Урыстәылатәи Афедерациеи Аԥсны Аҳәынҭқарреи рыбжьара еиуеиԥшым аусхкқәеи ахырхарҭақәеи рыла 100 инареиҳаны аҳәынҭқаррабжьаратәи, анапхгарабжьаратәии ахылаԥшырҭабжьаратәии аиқәшаҳаҭрақәа рнапаҵыҩра мҩаԥгоуп.
