Аҟәа. Рашәарамза 10, 2023 шықәса. Аԥсныпресс. Аҿари аспорти русқәа рзы аҳәынҭқарратә Еилакы аҿар Аԥсны раԥхьаӡа акәны имҩаԥысраны иҟоу «плоггинг» ҳәа изышьҭоу агәам-сам аизгара зцу аҩра рхы аладырхәырц азы ааԥхьара ҟанаҵоит.
Уи азы аусмҩаԥгатә иалахәхо 4 – 8-ҩык злоу аиҩызцәа, аколлегацәа, уҳәа рыла ишьақәгылоу акоманда еизгатәуп, анаҩс рашәарамза 10 аҟынӡа алахәхаразы онлаин-зыҳәамҭа харҭәаатәуп.
Акомандақәа зегьы рҿы иалкаау аӡәы анаҩс аусеиҭадулара зылшо ацрыҵқәа - апластик, ақьаад, асаркьа, (уи аԥҽыхақәагьы уахь иналаҵаны), аихамаҭәақәа, уҳәа еизигалоит. Аусеиҭадулара зылшо зегьы аусдулара ахь идәықәҵахоит.
Акциа апроект «Аклиматтә шәарҭарақәа рганахьала ауааԥсыра разыхиара аҩаӡара ашьҭыхра» аҳәаақәа ирҭагӡаны инагӡахо аекологиатә инициатива «Абхаз Деск» «Адунеи агәам-сам аҟынтәи еиқәҳархап» ала имҩаԥысуеит.
Аусмҩаԥгатә мҩаԥгахоит рашәарамза 17, Аҟәа ақалақь (Кәыдрытәи амҩа) аҿы. Алагара аамҭа 15:00 сааҭ рзы.
Аҿари аспорти русқәа рзы аҳәынҭқарратә Еилакы аусмҩаԥгатә апартниор аҳасабала иқәгылоит.
