Аҟәа. Лаҵарамза 9, 2023 шықәса. Аԥсныпресс. Аԥсны Жәлар Реизара-Апарламент Аиҳабы Ашәба Лаша Аџьынџьтәылатә еибашьра дуӡӡа аветеранцәа Аиааира амш рыдиныҳәалеит.
Адныҳәалараҿы иҳәоуп:
«Ҳаҭыр зқәу Алексеи Иосиф-иԥа! Акыр иаԥсоу аветеранцәа!
Аԥсны Жәлар Реизара – Апарламент ахьӡала ишәыдысныҳәалоит Аџьынџьтәылатә еибашьра дуӡӡаҟны Аиааира 78 шықәса ахыҵра!
Абри аҟара шықәсарацәа шыҵхьоугьы, есышықәса Лаҵарамза 9 амш аҽны хьааи гәырҩеи ишәхышәгаз шырацәоугьы, гәырӷьарак, гәалаҟара ҷыдак ацуп ари амш.
Ишәыдгылаз шәҩызцәа, шәыуацәа, шәҭынхацәа аӡәырҩы абри ашықәс еиқәаҵәақәа раан иҭахеит. Урҭ хашҭра рықәӡамкәа ҳгәалашәараҿы иҟазаауеит есқьынгьы.
Иахьагьы шәара – ари Аибашьра ду иалахәыз, аԥсадгьыл ахьчаҩцәа рзы акыр аџьа збаз зегьы – фырхаҵара згым шәҭоурых иааӡоит абиԥара ҿыцқәа, ҿырԥшыга бзианы ирыцуп хәызмаӡам шәгәалашәарақәа.
Акыр иаҳзаԥсоу аветеранцәа, ишәыдаҳныҳәалоит Аиааира амш!
Ишәзеиӷьаҳшьоит агәабзиара, ахирра!»
