Аҟәа. Мшаԥымза 24, 2023 шықәса. Аԥсныпресс. Аекологиа Аинститут UNDP, SIDA апроект «Ауааԥсыра аклиматтә шәарҭарақәа рҿагыларалшара арӷәӷәара» аҳәаақәа ирҭагӡаны Баслеи Кәыдри аӡиасқәа рҿы иҟоу ашәарҭарақәа рыхсаалагақәа еиқәнаршәараны иҟоуп.

Уи азы Аинститут аспециалистцәа аӡиасқәа авиртуалтә агидравликатәии агидрологиатәи амодельқәа аԥырҵоит.   

Ашәарҭарақәа рыхсаалагақәа ашәарҭарақәа раарԥшреи урҭ иааҳакәыршаны иҟоу аԥсабареи аӡиасқәа ирыԥну аҭыԥқәа рҿы инхо ауааԥсыреи аӡиасқәа рыԥшаҳәаҿы иҟоу анаплакқәеи ишырныруа аилкаара иацхраауеит.

Баслеи Кәыдри аӡиасқәа рмониторинг азы аусмҩаԥгатәқәа аклимат глобалла аиҭакрақәа ирыхҟьаны иҟалар зылшо аӡхыҵрақәеи асырӡлеирақәеи ирыцу ашәарҭарақәеи ахҟьаԥҟьақәеи излауа ала рырмаҷра иазырхоуп.