Аҟәа. Хәажәкырамза 18, 2023 шықәса. Аԥсныпресс. Ауаажәларратә зинеиҿкаара амониторинг Ацентр аатит Ахылаԥшырҭа иаҵанакуа Аҟәа ақалақь аҩныҵҟатәи аусқәа Русбарҭа актәи аҟәша аԥыԥшырҭатә хәҭа аҿы, ҳәа адырра ҟаҵоуп Аԥсны аҩныҵҟатәи аусқәа Рминистрра аофициалтә саит аҟны.
Ахыдлаԥшреи азхьаԥшреи рзы апункт ҿыц даҭааит аҩныҵҟатәи аусқәа рминистр ихаҭыԥуаҩ Беслан Ҷкадуа. Уи аспециалистцәа русура гәеиҭеит, убри аан уи «ауаажәларратә мониторинг атерриториалтә локациа араион аҿы иҟало азинеилагарақәа зегьы ианаамҭоу азхьаԥшреи аԥхьырҟәҟәаареи рзы анапхгараҭаратә ӡбамҭақәа рыдкылараҿы хадара злоу ароль нанагӡоит» ҳәа инаҵшьны иазгәеиҭеит.
Аҳабла Ҿыц амилициа аҟәша аспонсортә цхыраара ала амониторинг азы иахәҭоу аиқәыршәагақәа рыла еиқәыршәоуп. Ахәаахәҭратә ҩны «Рубин» амониторқәа рыҭара еиҿнакааит, аинтернет-проваидер «Система» зегьы еиҳа ирацәаны ауааԥсыра ахьеиланхо аҳҭнықалақь араионқәа иреиуоу Аҳабла ҿыц ихадоу аҭыԥқәа рҿы ишьақәыргылоу авеб-камерақәа рҟынтәи еиԥырҟьарада авидесахьақәа рырбара алнаршеит.
