«Сара шәара шәҟынтәи еиҳаны аихьӡарақәа сырзыԥшуп. Ашьаусԥшаара иаҵанакуа ауаа маҷны иаанкылоуп. Жәаҳәарада, атәыла ааныжьны ацара иахьӡазгьы ыҟоуп, аха имаҷымкәа аҿаҩа қыҭақәеи аҳаблақәеи, аламала уаҩы иахьиҿырхасырҭам аҭыԥқәеи рҿы рцәыҵәахны иҟоуп», – ҳәа иҳәеит аминистр.  

Аҳасабырбатә аамҭахәҭа азы Гәдоуҭа араион ауаажәларратә шәарҭадара амилициа ала ишьақәыргылахеит 268 административтә пкаанҵақәа, урҭ рахьынтә 162 апаспорттә режим аилагара азы,  16 – уи аҟара зҵазымкуа ахулиганра азы, 3 – изакәанымкәа анаркотикатә маҭәашьарқәа рыдкылара азы.

Аҳәынҭқарратә автоинспекциа анапхгаҩы иҟаиҵаз адыррақәа рыла, 2022 шықәсазы иҟалеит ҳәа ашәҟәы иҭагалахеит 48 амҩа-транспорттә амашыр хҭыс, урҭ рҿы иҭахеит 12-ҩык.

Шықәсык ала Аҳәынҭқарратә автоинспекциа аусзуҩцәа рыла иаарԥшхеит 6 152 инарзынаԥшуа амҩаҿы аныҟәара аԥҟарақәа реилагара иадҳәалоу афактқәа, урҭ рахьынтә 505 –  ижәны автомашьына аԥсҟы акра иадҳәалоуп. 340-ҩык амашьына арныҟәцаразы аршаҳаҭгақәа рымхуп.  

Вальтер Быҭәба араион аҿы акриптовалиута арҳара азы афермақәа раарԥшра азы имҩаԥысуа аусура арӷәӷәара азы анапынҵақәа ҟаиҵеит. Уи иара убас ауааԥсыра аҭынч ԥсҭазаараҿы ахархәаразы ирымоу рабџьар ашәҟәҭагалара аҿы ацхыраара рыҭара шхымԥадатәиу азгәеиҭеит.  

Иара убас, аҩныҵҟатәи аусқәа рминистр Гәдоуҭа араион аҩныҵҟатәи аусқәа Русбарҭа уажәы иҟоу хаҭалатәи аилазаара – егьырҭ амилициа араионтә ҟәшақәа рзы иҿырԥшыганы иҟоуп ҳәа инаҵшьны иазгәеиҭеит.

«Ашьаусԥшаара – ари, амилициа зегьы злашьақәгыло ауп, шәара даара ибзианы аус зуа Ашьаусԥшаара аилазаара шәымоуп. Аха уеизгьы, урҭ иахьа иаҳдырбо алҵшәақәа ас еиԥш иҟоу хаҭалатәи аилазаара азы иазхоны иҟам. Шәара акоманда шьахә еиқәыршәаны ишәымоуп, аха аусура аиҿкаара еиҳа еиӷьзаргьы ҟалон», - ҳәа иҳәеит Вальтер Быҭәба.  

Атәыла аҩныҵҟатәи аусқәа рминистр Гәдоуҭа араион аҩныҵҟатәи аусқәа Русбарҭеи аҳәынҭқарратә Шәарҭадара Амаҵзура араионтә ҟәшеи русеицура ахәшьара бзиа аиҭеит.