Аҟәа. Жәабранмза 3, 2023 шықәса. Аԥсныпресс. Жәабранмза 3 рзы атәыла аҩныҵҟатәи аусқәа рминистр Вальтер Быҭәба аҳәынҭқарратә автоинспекциа аусбарҭа аколлектив дыдирдырит анапхгаҩы инапынҵақәа рынагӡаҩыс иҟаҵоу Родик Базба.
«Шәара зегьы ибзианы дыжәдыруеит Родик Виктор-иԥа, уи 20-шықәса инареиҳаны аҩныҵҟатәи аусқәа Рминистрра асистема аҿы аус иухьеит. Шәара зегьы шәҟынтәи сара сазыԥшуп ламысцқьала, ҳәоуеиқәшәарала аусура. Иазгәасҭарц сҭахуп, Баҭал Агрба аҩныҵҟатәи аусқәа Рминистрра асистема аҿы даанхоит сара сыцхырааҩ иаҳасабала, уи ҳаԥхьаҟагьы шәусура аҿы ацхыраара шәиҭалоит», - ҳәа инаҵшьны иазгәеиҭеит аминистр Вальтер Быҭәба.
Уи иара убас Родик Базба иусура аҿы ақәҿиарақәа изеиӷьаишьеит.
Ауаажәларратә шәарҭадара азы амилициа аусура ахылаԥшара аҭара азы аҩныҵҟатәи аусқәа рминистр актәи ихаҭыԥуаҩ Беслан Ҷкадуа аҳәынҭқарратә автоинспекциа аусбарҭа аусура аихьӡарақәеи арбагақәеи рыҩаӡара иааубаратәы иазҳаит ҳәа иазгәеиҭеит.
«Иҟоу аҩаӡара ашьҭыхра азы имаҷымкәа аусура аҭахуп. Иарбоу аусура аҿы ақәҿиарақәа шәзеиӷьасшьоит зегьы», - ҳәа иҳәеит Беслан Ҷкадуа.
