Аҟәа. Жәабранмза 1, 2023 шықәса. Аԥсныпресс. «Амшынеиқәафымцамч» афымцамч ала аиқәыршәара аҿы аԥкрақәа рзы аграфик ҿыц алагалара инамаданы, атәыла агәабзиарахьчара аминистр Едуард Быҭәба араионтәии ақалақьтәии ахәышәтәырҭақәа рҳақьым хадацәа дрыҿцәажәеит.
Амедицинатә усбарҭақәа рхадацәа афымцамч аамҭала аҿыхрақәа ишазыҟаҵоу атәы еиҭарҳәеит, убри аан араионтәии ақалақьтәии ахәышәтәырҭақәа зегьы адизельтә генераторқәа рыла еиқәыршәоуп ҳәа иазгәаҭан.
Аппаратқәа зегьы аштаттә режим ала аус руеит, уи амедусбарҭақәа рҿы афымцамч ала аиқәыршәара аԥкрақәа ралагалара аамҭа азы атәылауаа рзы ихымԥадатәиу амаҵзурақәа ркомплекс амҩаԥгара алнаршоит.
Аминистр Едуард Быҭәба иҟоу аҭагылазаашьа ахылаԥшра аҭареи есыҽны ахәышәтәырҭақәа русура азы адырра ирҭаларц азы анапынҵақәа ҟаиҵеит.
