Мшаԥымза, 2022 шықәса рзы апроект «Кавказтәи афронт» аҳәаақәа ирҭагӡаны Аҟәа ақалақь иҟоу Москватәи Акультура-усуратә Центр «Москва Аҩны» аҿы «Аџьынџьтәылатәи еибашьра Дуӡӡа аҭоурых афальсификациеи ҳаамҭазтәи амедиа аҿы аманипулиациақәеи раҿагылара» атема ала астол гьежь еиҿкаан иагьымҩаԥган.
Ари аусмҩаԥгатә рхы аладырхәит Аԥсны иҟоу Урыстәылатәи Афедерациа Ацҳаражәҳәарҭа, Урыстәыла аус ацура Ахаҭарнакра, Аԥсны атәылахьчара Аминистрра ахаҭарнакцәа, аҭоурыхҭҵааҩцәа, ажурналистцәа, ауаажәлрратә усзуҩцәа.
Ԥхынгәымзазы апроект «Кавказтәи афронт» адокументалтә фильм «14 мшы» аҭыхра ала ихацыркхеит. Афильм — 1941-1945шш. Аџьынџьтәылатәи еибашьра Дуӡӡа азы ашьха иаԥну Ԥсҳәы ақыҭа анемец фашистцәа рыла ампыҵакра иазкуп. Ԥхынгәымза 8 – 12, 2022 шықәа рзы имҩаԥысыз аекспедициа аилазаара иалалеит акультуратә фонд «Платформа» адиректор, апроект «Кавказтәи афронт» автор, адокументалтә фильм «14 мшы» арежиссиор Дмитри Статеинов, апроект автор Сергеи Серкин, антрополог, Урыстәыла Анаукақәа Ракадемиа атеориеи аметодикеи рыҟәша анаукатә усзуҩ еиҳабы, аҭоурыхтә наукақәа ркандидат Татиана Шведчикова, оператор Сергеи Иазвински, Аҟәа ақалақь иҟоу Москватәи Акультура-усуратә Центр «Москва Аҩны» ахаҭарнак Мариа Соиа, иара убас аволонтиорцәа — Дмитрии Кулаковски, Владимир Остапиенко, Ольга Кожевникова, Дарина Соиа, Лаура Статеинова.
Аҭаара аҳәаақәа ирҭагӡаны иара убас имҩаԥган: аҭоурыхтә фотоцәыргақәҵа азы афотоҭыхрақәеи аинформациа аизгареи, 1941-1945шш. Аџьынџьтәылатәи еибашьра Дуӡӡа аан 1942-1943 шш. рзы Кавказ ахақәиҭтәра азы Ажәылара аан иҭахаз асовет солдатцәа анышә иахьамадоу аҭыԥқәа рархеологиатә хсаала аиқәыршәара иазку аусура мҩаԥган, Ԥсҳәы ақыҭан игылоу, анемец штаб ахьыҟаз аҩны ахьгылаз аҭыԥ аҭҵаара, Ԥсҳәы ақыҭан анышә иамадоу асовет солдатцәа рыԥсыжырҭақәа реилыргара, уҳәа убас ирацәаны еиуеиԥшым аумҩаԥгатәқәа мҩаԥган. Ԥсҳәы ақыҭа уахьналҵуа иҟоу Пыв ҳәа изышьҭоу аҩхаа аҿы игылоу Кавказ ахақәиҭтәра зхы ақәызҵаз асолдатцәа рбаҟақәа ҩба рреставрациа азԥхьагәаҭаны иҟоуп.
Аҭаара аихшьаалақәа рыла Sputnik Аԥсны апресс-центр аҟны апресс-конференциа мҩаԥган. Араҟа имҩаԥгаз аусура азы аҳасабырба нарҭбааны иҟаҵан.
«Ԥхынгәымза 25 рзы ҳара Кавказ ахақәиҭтәра азы Ажәылара 80-шықәса ахыҵра иазкны Аҟәа ақалақь аҿы игылоу Идырым асолдаҭ ибаҟа амҵан ашәҭ шьыҵәрақәа рышьҭаҵара мҩаԥаҳгеит. Иарбоу ацеремониа рхы аладырхәит Аҟәа ақалақь иҟоу Москватәи акультура-усуратә Центр «Москва Аҩны», Аԥсны иҟоу Урыстәыла аус ацура Ахаҭарнакра, ауаажәларратә еиҿкаара «Аԥсны иҟоу Урыстәыла атәылауаа рзин ахьчара Ацентр» ахаҭарнакцәа, Аԥснытәи аҳәынҭқарратә Университет астудентцәа, Аԥсны атаитә бокс Афедерациа ахаҭарнакцәа», - ҳәа иазгәаҭоуп аҳасабырба аҿы.
Апроект аԥшааратә усура анаҩс аҿар рпатриоттә ааӡареи аҭоурых аҭҵаареи анацисттә идеалогиа аҿагылареи, иара убас Аџьынџьтәылатәи еибашьра Дуӡӡа аҭоурых аицакреи афальсификациа алмыршареи ахықәкы хаданы иҟоуп.
Апроект аҳәаақәа ирҭагӡаны Кавказ ахақәиҭтәразы Ажәылара 80- шықәса ахыҵра иазкны имҩаԥган аҿартә квест «Кавказтәи афронт». Уи рхы аладырхәит ашколқәа хԥа— №3, №7, Ацхыраагӡатә школ аиҳабыратә классқәа рҵаҩцәа.
Аусмҩаԥгатә иалахәыз ирызшан изхыстәыз алокациақәа зныз ахсаалақәа. Уи – Аԥсны аҳәынҭқарратә музеи, Аџьынџьтәылатәи еибашьра Дуӡӡа аан арратә хәышәтәырҭа ахьыҟаз Аҟәа ақалақьтә хәышәтәырҭа, иара убас Идырым асолдаҭ ибаҟа. Аетапқәа рахысраан ашколхәыҷқәа Кавказ ахақәиҭтәра азы Ажәылара аҭоурых иазкны азҵаарақәа рҭак ҟарҵон, ахәра зауз ауаҩы актәи амедицинатә цхыраара иҭара азы адыррақәа роуан, иара убас автомат «Калашников» аимыхреи аибыҭареи рзы рылшарақәа ԥыршәон. Аусмҩаԥгатә даара иҳараку аҩаӡара аҿы имҩаԥысит.
Абҵарамзазы апроект «Кавказтәи афронт» Москватәи аамилаҭқәа Рыҩны аҿы имҩаԥысыз астол гьежь «урыстәылатәи арратә ахьӡ-аԥша иацҵаны иназыгӡо» аҿы адгалара мҩаԥгахеит.
2023 шықәсазы Кавказ ахақәиҭтәра азы Ажәылара 80-шықәса ахыҵра иазкны аусмҩаԥгатәқәа жәпакы рымҩаԥгара азԥхьагәаҭоуп.
Акультуратә фонд «Платформа» уи азы агәазыҳәара змоу зегьы иарбоу аусмҩаԥгатәқәа рылахәхареи ирылшо ала рлагала алаҵареи рзы ааԥхьара рынаҭоит.
