Аҟәа. Ԥхынҷкәынмза 8, 2022 шықәса. Аԥсныпресс. 31 шықәса раԥхьа, ԥхынҷкәынмза 8, 1991 шықәса рзы Асоветтә Социалисттә Республикақәа Реидгыла хыбгалеит.
Асоветтә республикақәа хԥа – Урыстәылатәи Асоветтә Федеративтә Социалисттә Республика (РСФСР), Белоруссиеи Украинеи «Ихьыԥшым Аҳәынҭқаррақәа Реиҩызара аԥҵара азы Аиқәшаҳаҭра» рнапаҵаҩра мҩаԥысит. Анаҩс уи анапаҵыҩра ахьымҩаԥысыз аҭыԥ инамаданы «Беловежсктәи аиқәшаҳаҭра» ҳәа иахьӡхеит.
Аиқәшаҳаҭра анапаҵыҩра Беловежтәи абна (Белоруссиа) имҩаԥысит.
Аусшәҟәы рнапы аҵарҩит асоиузтә республикақәа хԥа рнапхгарақәа рхадацәеи иреиҳау амаҵурауааи: Ареспублика Беларусь аҟынтәи Станислав Шушкевичи Виачеслав Кебичи, Урыстәылатәи Афедерациа (РСФСР) аҟынтәи Борис Ельцини Геннади Бурбулиси, Украина аҟынтәи Леонид Кравчуки Витольд Фокини.
Аа-шықәса рышьҭахь, ԥхынҷкәынмза 8, 1999 шықәса рзы Урыстәылеи Белорусиеи рхадацәа Борис Ельцини Александр Лукашенкои Урыстәылеи Белорусиеи Реиҩызаратә ҳәынҭқарра аԥҵара азы Аиқәшаҳаҭра рнапы аҵарҩит.
