Заатәи аусеилыргара ала ишышьақәыргылоу ала, жәабранмза 26, 2022 шықәса рзы,   01:00 сааҭ инарзынаԥшуа, Гәдоуҭа араион Џьырхәа ақыҭан  Цушба А.Ф. Чачибаиа С.В., Агумаа В.В., Гәазаа Т.М., Носов Н.В., Барзаниа Р.З.  заанаҵы дрыҿцәажәаны Анқәаб В.К. иҩнынтәи дԥааны  автомашьына УАЗ (ашәҟәҭагаларатә номер К 865СА, 159-тәи   арегион) ала Гәдоуҭа араион Дәрыԥшь ақыҭа,  Барзаниа А.В. иҩнахьы днаргеит.

Амҵарсҩцәа Вадим Анқәаб иԥа Малхаз Анқәаб рыҽимардан  иԥааны ирымоу ауаҩы ихақәиҭтәра азы   10  млн. мааҭ рҟынӡа  аҿыхԥса ашәара идыргалеит.  

Хәажәкырамза 10, 2022 шықәса рзы,  Малхаз Анқәаб амҵарсҩцәа аҿыхԥса ахәҭа аҳасабала 1 млн. мааҭ анырзиишьҭ ашьҭахь, иаб Вадим Анқәаб Гәдоуҭа араион Аацы ақыҭан ихы дақәиҭтәхеит.

Азинхьчаратә усбарҭақәа русзуҩцәа аоператив-усеилыргаратә усмҩаԥгатәқәа рымҩаԥгара иалҵшәаны, ауаҩы иԥаара иалахәыз ауаа ааныркылеит ашьауӷатә ҭакԥхықәрагьы иақәдыршәеит.

Цушба А.Ф. иганахьала ашьаусԥшаара хацыркуп, иара убас ихацыркыз аусеилыргара хазы аусеиҿкаара ахь ииагоуп.

Носов Н.В.  иганахьала у уи ипсихологиатә  ҭагылазаашьа аилкаара азы амедицинатә ҟазшьа змоу агәаҭарақәа ихгара азы ақәҵара рыдыркылеит.