Аҟәа. Абҵарамза 9, 2022 шықәса. Аԥсныпресс. Абҵарамза 9 рзы Симферополь ақалақь аҿы иалагеит IV Аԥсны Аҳәынҭқарреи Ареспублика Ҟрыми рыбжьара ахәаахәҭра-економикатә, агуманитартә, анаука-техникатә усеицура азы аҩганктәи Анапхгарабжьаратәи Акомиссиа аилатәара. Уи рхы аладырхәуеит Анапхгарабжьаратәи Акомиссиа иалахәу аԥснытәии ҟрымтәии аганқәа рылахәылацәа, иара убас аҩ-ҳәынҭқаррак рҟынтәи ааԥхьара зауз аминистррақәеи ахылаԥшырҭақәеи рхаҭарнакцәа.
Аилатәара аартуа, акомиссиа ацхантәаҩцәа ралагалажәа ҟаҵо раԥхьа дықәгылеит Анапхгарабжьаратәи Акомиссиа ҟрымтәи аган ахантәаҩы, Ареспублика Ҟрым аминистрцәа Рхеилак Ахантәаҩы ихаҭыԥуаҩ – Урыстәылатәи Афедерациа Ахада иҟны иҟоу есымша аус зуа Ареспублика Ҟрым Ахаҭарнак Георги Мурадов. Анаҩс аилатәара иалахәыз бзиала шәабеит ҳәа раҳәо дықәгылеит аилатәара амшхәаԥштәгьы даԥхьеит Акомиссиа аԥсуа ган ахантәаҩы, Аԥсны аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа.
Акомиссиа аусура аҳәаақәа ирҭагӡаны еиуеиԥшым ахырхарҭақәеи аусхкқәеи рыла апрограмма аус ауеит. Апрограмма ҩы-шықәса ирҭагӡахоит, уи иалоуп 40 усмҩаԥгатә инареиҳаны.
Аиԥылара ахыркәшамҭаз аганқәа Анапхгарабжьаратәи Акомиссиа аԥшьбатәи аилатәара аԥкаанҵа рнапы аҵарыҩуеит.
