Аҟәа. Абҵарамза 9, 2022 шықәса. Аԥсныпресс.  Аԥсны Адәныҟатәи аусқәа рминистр Инал Арӡынба Москва, Урыстәыла ҿыц змаҵура иахагылаз Шьамтәылатәи Арабтә республика ацҳаражәҳәаҩ Башар Џьаафари диԥылеит. Аиԥылара мҩаԥысит Москва иҟоу Шьамтәылатәи Арабтә республика Ацҳаражәҳәарҭаҿы.

Инал Арӡынба Башар Џьаафари идиныҳәалеит ари аус ҿыц иахагылара.

Аганқәа алацәажәеит аԥсны-шьамтәылатәи аҳәынҭқаррабжьаратә еинырраз хра злоу азҵаарақәа, аполитикатә, аекономикатә, агуманитартә усхкқәа рҟны аҭагылазаашьақәа рызҵаарақәа.

Уи адагьы Инал Арӡынбеи Башар Џьаафари иара убасгьы иалацәажәеит Аԥсни, Урыстәылеи, Шьамтәылеи, Аахыҵ Уаԥстәылеи рыдәныҟаполитикатә усбарҭақәа рыҩаӡарала имҩаԥгахо абжьгарақәа рмеханизм аиҿкаара.

Хазы иазгәаҭан Аԥсылмантә республика Иран адиалог ацымҩаԥгара, аглобалтә шәарҭадара аиҿкаара асистемаҿы ари атәыла ароль.