Адныҳәалараҟны, ахәҭакала иҳәоуп:
*** Ҳаҭыр зқәу Аԥсуа телехәаԥшра аусзуҩцәа! Ишәыдысныҳәалоит иахьатәи аныҳәа! Абҵара 6 1978 шықәсазы аԥсуа жәлар зегьы рзы иҟалеит акыр зҵазкуа ахҭыс – аефир ахь иҭыҵит аԥсышәала ицәажәаз раԥхьатәи адырраҭара. Ари аамҭа иалагӡан шәнысымҩа даара ибеиоуп. Хазы иазгәасҭар сҭахуп аибашьраан ателехәаԥшра, арадио аусуцәа ижәбаз аџьабаа. Шәара ишәылшеит амаругақәа еиқәырханы аҳҭнықалақь ралгара, анаҩс Гәдоуҭантәи аефир ахь аҭыҵра. Рыԥсҭазаара ашәарҭара ишҭагылазгьы, ажурналистцәа афронт аҿы анҵамҭақәа ҟарҵон, уи иабзоураны ҳара иҳамоуп аибашьра иамшынҵахаз хәы змам архивтә кадрқәа. Хьаа дууп иахьа иахьҳалагылам аибашьраан иҭахаз, инаскьахьоу шәҩызцәа. Урҭ ргәалашәара хашҭра ақәым. Аибашьра ашьҭахь аамҭа хьанҭақәа раан гәкамыжьрада шәыжәлар рымаҵ жәуит. Иахьагьы шәзанааҭ пату ақәҵаны, шәыпрофессионалтә уалԥшьа нашәыгӡоит. Аиҳабыратә биԥара иаҵанакуа ателехәаԥшра аусзуҩцәа рԥышәа, рдырра рымардоит аҿарацәа. Еихаҳауа иаажәго, жәлары зегьы рзы иҿахәҳәагоу Аԥсуа телехәаԥшра иазеиӷьасшьоит аизҳара. Иахьа аус зуа, 44 шықәса рыбжьара аџьабаа збахьо зегьы даҽазныкгьы ишәыдныҳәало аныҳәа, ишәзеиӷьасшьоит агәабзиара, аҭынчра! Ҽаанбзиала, Аԥсуа телехәаԥшра!
Аԥсны Аҳәынҭқарра Ахада
А.БЖЬАНИА
