Ахьӡ-аԥша змоу аусмҩаԥгатә аҿы Аԥсны аҳәынҭқарра ӡырыргеит аинформмаҵзура «Аԥсныпресс» акорреспондент Аманда Касланӡиеи атуризм аминистрра апресс-маҵзура аиҳабы Оксана Табаӷәуки.

Амедиагәыԥ «Урыстәыла иахьа» Москватәи аофис аҿы имҩаԥысуаз хәымштәи арҵаратә марафон еиднакылеит Аԥсни, Аахыҵ Уаԥстәылеи, Беларуссиеи, Таџьикисҭани, Узбекистани, Кыргызсҭани, Ҟазахсҭани рҟынтәи ажурналистцәа ҿарацәеи, аблогерцәеи, аусбарҭатә пресс-маҵзурақәа русзуҩцәеи.

16-тәи амодуль арҵаратә план азырхан аԥхьагылара змоу атехнологиақәа практикала рхархәара. Азыӡырҩцәа иуникалтәу рԥышәа рыцеиҩыршон амедиагәыԥ аресурс хадақәа – Sputnik, РИА Новости, ИноСМИ рыпродиусерцәа, рдизаинерцәа, рредактор хадацәа.

Асеминар апрограмма иалалеит апрактикатә зыҟаҵарақәеи аинтерактивтә мастер-классқәеи. Аинтенсив зегь реиҳа иналукааша, игәнукылаша аетапқәа ируакхеит зтехнологиа ҳараку авиртуалтә студиаҿы аворкшоп. Уи анаҩсангьы, ажурналистцәа апрактикаҿы рнапаҿы иааргон амобилтә видеомонтаж.

Аԥсны атуризм аминистрра апресс-маҵзура аиҳабы Оксана Табаӷәуа лзы ари амодуль адебиуттә ҟазшьа аман, аха алҵшәа аиуит.

«Сара раԥхьаӡа акәны SputnikPro апрограмма салахәуп, ари аинтенсив сыззыԥшыз зегьы ираԥнагеит. Хәымш рыла иҳауз ихәарҭоу аинформациа амҽхак дууп. Апрограмма иахьынӡауа ҟазарыла ишьақәыргылоуп: атеориа аҟынтәи иаразнак апрактикахь ҳаиасуан. Сара сзы, аусбарҭа апресс-маҵзура напхгаҩык иаҳасабала, даара акыр иаԥсан иахьа амедиа ҿыцқәеи, Telegram-каналқәеи, иԥсабаратәым аинтеллект амыругақәеи аус шыруа аилкаара. Иҳауз аҟазара хымԥада Аԥсны ҳхы иаҳархәалоит ҳреспублика атуристтә усхк еиҳа хра аманы аинформациатә цхыраара аҭаразы», – лҳәеит лара.

Аҵара инаваргыланы амедиашкола алахәылацәа акрызҵазкуа апрактикатә ԥышәара роуит. Дарбанызаалак аспециалист имҩаԥысыз асеминар иазку минуҭктәи авидеонҵамҭа азырхианы иӡыригеит.

Апроектқәа қәҿиарала рыхьчара ашьҭахь амодуль аихшьаалақәа рыҟаҵареи асертификатқәа рыҭареи рзы аофициалтә церемониа мҩаԥысит.