Аҭҵаарадыррақәа Ракадемиаҿы имҩаԥысуаз аныҳәатә церемониа иалахәын Аԥсны аҭҵаарадыррақәа ракадемиа апрезидиум алахәылацәа, аҭҵаарадырратә институтқәа рнапхгаҩцәа, Аԥсны Ахада Иусбарҭа ахаҭарнакцәа.

Аиқәшаҳаҭра аҳәаақәа ирҭагӡаны аганқәа ргәы иҭоуп еицырзеиԥшу апроектқәа рынагӡара, аҭҵаарадырратә конференциақәеи асеминарқәеи рымҩаԥгара, атехнологиақәа реимдара, иара убас актуалтә кадрқәа разыҟаҵара.

Аԥсны аҭҵаарадыррақәа ркадемиа апрезидент Зураб Џьапуа инаҵшьны иазгәеиҭеит аҵак ҷыда шарҭо Урыстәылатәи аҭҵаарадырратә центрқәа рымадара.:

«Ҳара Урыстәылатәи аҳәынҭқарратә социалтә университет аус ацура ҳарҭбаауеит, иҳарҵаулоит. Ҳара ҳзы ари аҵакы змоу шьаҿоуп. Агәра ганы сыҟоуп анапы зҵаҩу адокумент егьырҭ Урыстәылатәи ҳколлегацәеи ҳареи иҳабжьоу аиқәшаҳаҭрақәа реиԥш аусқәа рыла ишышьақәырӷәӷәахо», — ҳәа азгәеиҭеит Аԥсны аҭҵаарадыррақәа Ракадемиа апрезидент.

Урыстәылатәи аҳәынҭқарратә социалтә университет аректор Андреи Хазин иҳәеит ауниверситет аҿы Аԥснытәи астудентцәеи аспирантцәеи аҵара шырҵоу, иааиуа ашықәс инаркны иреиҳау аҵараиурҭа ареспубликаҟынтәи ашколхәыҷқәа ауниверситеттә коллеџь ахь рыдкылара ишалаго.

«Аусеицура аҿиара ҳтәылақәа рыҭҵаарадырратә еилазаара аимадарақәа арӷәӷәоит. Аԥсны Урыстәыла аус ацура иабзоураны хәыҷы-хәыҷла иҿиоит. Ҳара ҳаиқәшаҳаҭра ԥхьаҟа ацара иацхраауеит», - ҳәа аҳәамҭа ҟаиҵеит Андреи Хазин.