АЖӘАБЖЬҚӘА
сегодня 11:49
Аԥсны ауаҩы изинқәа рыхьчаразы азинмчы змоу Анас Кьышьмариеи Урыстәыла ауаҩы изинқәа рыхьчаразы азинмчы змоу Иана Лантратовеи еиԥылеит аҩаша, жьҭаарамза 6 рзы Махачкала ақалақь аҿы
Аиԥыларахьы Даӷьсҭантәи аомбудсмен Запир Алхазов иааԥхьарала иааит Урыстәылеи аҳәаанырцә ааигәеи ррегионқәа рҟынтәи аҳәынҭқарратә зинхьчаҩцәа «Иҷыдоу арратә операциа алахәылацәа рзинқәа рыхьчаразы актуалтә зҵаарақәа: ариашара, усурҭала реиқәыршәара» атемала Урыстәылазегьтәи аилацәажәара алахәхаразы.
Кьышьмариеи Лантратовеи реиԥылара рхы аладырхәит аусмҩаԥгатә аиҿкааҩ Запир Алхазови Аԥсны Аҳәынҭқарраҟны ауаҩы изинқәа рыхьчаразы азинмчы змоу иаппарат анапхгаҩы Саида Еныкьи. Аиԥылара алахәылацәа азинхьчаратә институтқәа рыбжьара аусеицура аҿиара ахырхарҭақәа ирылацәажәеит, иара убас Урыстәылатәи аомбудсменцәа афедералтә ҩаӡарақәа рҿы еиԥш арегионалтә ҩаӡарақәа рҿгьы имҩаԥырго аусмҩаԥгатәқәа Аԥснытәи рколлегацәа ралахәхара аграфик азгәарҭеит.
