АЖӘАБЖЬҚӘА
сегодня 12:02
Аԥсны адәныҟатәи аусқәа рминистрреи Россотрудничествои аҵарадырра аусхк аҟны аинырра иалацәажәеит
Аԥсны адәныҟатәи аусқәа рминистр Олег Барцыц Москва диԥылеит Россотрудничество анапхгаҩы Игор Чаика, аганқәа алацәажәеит аҵара, аспециалистцәа ҿарацәа рԥышәа аизырҳара.
Аиԥылара иара убас рхы аладырхәит Урыстәылатәи Афедерациаҿы иҟоу Аԥсны ацҳаражәҳәарҭа абжьгаҩ-ацҳаражәҳәаҩ Мадина Аҩӡба, адипмиссиа аҩбатәи амаӡаныҟәгаҩ Ренад Бениа.
Олег Барцыц иазгәеиҭеит Ареспубликаҿы Россотрудничество апроектқәа шырацәоу, ҷыдала дазааҭгылеит амаҵзура ашьаҭала аԥсуа специалистцәа ҿарацәа рзы арҵаратә программақәеи аԥышәа аизырҳарақәеи.
Игор Чаика иакәзар, ишьақәгылаз аинырра ахаҭабзиара ҳараки аиҩызаратә ҟазшьеи инаҵшьны иазгәеиҭеит, иагьигәалаиршәеит амаҵзура Аԥсны аус шауа 2009 шықәса раахыс. Иара иажәақәа рыла, 2026 шықәсазы Россотрудничество ибзоурала Урыстәылатәи аҵараиурҭақәа ирҭалеит 115-ҩык ареспублика атәылауаа.
Аганқәа алацәажәеит аушьҭымҭацәа рыԥсадгьыл ахь рырхынҳәреи усурҭала реиқәыршәареи ацхрааразы ауснагӡатәқәа, иреиҳаӡоу аҵареи агуманитартә проектқәеи русхк аҟны аусеицура аԥеиԥш, иара убас Аԥсны адәныҟатәи аусқәа рминистрреи аҳәаанырцә иҟоу Аурыс ҩнқәеи русеицура алыршара.
