АЖӘАБЖЬҚӘА
сегодня 18:15
Аԥсны Ахада Бадра Гәынба ақыҭа ашықәс иазырхоу апрограмма заанаҵтәи аихшьаалақәа рыла аилацәажәара мҩаԥигеит
Атәыла ахада иазгәеиҭеит 2026 шықәсазы ихацыркыз апрограммақәа зегьы уи анхыркәшахалак ашьҭахьгьы игәыгәҭажьтәым ҳәа.
«Ақыҭа баша ҳтәылауаа ахьынхо ҭыԥӡам. Ари ҳбызшәеи, ҳкультуреи, ҳҷыдареи, ҳатрадициақәеи ахьеиқәырхоу ҭыԥуп», — ҳәа инаҵшьны иазгәеиҭеит Гәынба.
Аԥыза-министр Владимир Делба иҳәеит аусмҩаԥгатәқәа ишрыҵаркуа акультура, аҵара, аспорт, ақыҭанхамҩа, агәабзиарахьчара, асоциалтә цхыраара, аинфраструктура. Ақыҭақәа рҿы амҩақәа, алашареи ӡыла аиқәыршәареи рсистемақәа еиҭашьақәдыргылоит, аҵакырақәа дырҽеиуеит, ахәыҷқәа ахьыхәмаруа аҭыԥқәа шьақәдыргылоит.
Аԥыза-министр ихаҭыԥуаҩ Џьансыхә Нанба ақыҭақәа зегьы миллионк-миллионк мааҭ ахьырзоурыжьуа апрограмма шымҩаԥысуа азы адырра ҟаиҵеит. Азыҳәақәа нарышьҭит 92 қыҭа, раԥхьатәи аӡбамҭақәа хԥа рыдыркылахьеит, иаанхеит 18 еиланхарҭа. Аҳәынҭқарра ахада анапынҵа ҟаиҵеит ари аус дырццакырц азы.
Аҵара аминистр Хана Гәынба еиҭалҳәеит апрограмма «Ақыҭа школ» азырхиара атәы. Аҵарашықәс ҿыц азы имҩаԥгахоит ақыҭа рҵаҩцәа рыбжьара аицлабра «Ашықәс арҵаҩы», ашколхәыҷқәа рзы аспорттә хәмаррақәа. Ашколқәа рыхәҭак автобусқәа роухьеит, русура етап-етапла иацырҵоит.
Акультура аминистр Даур Ақаҩба ақыҭақәа рҿы арҿиаратә коллективқәа ргастрольқәа ртәы иҳәеит, апроект «Амузыка ахәыҷқәа рзы» налаҵаны.
Аенергетика аминистр Баҭал Мышәба иҳәеит ашықәс иалагазар ақыҭақәа рҿы 55 нызқь метра рҟынӡа афымцацәаҳәа шыԥсахыз 38 станциа маҷ шышьақәдыргылаз. Ақыҭанхамҩа аминистр ихаҭыԥуаҩ Дмитри Ҳагәышь иазгәеиҭеит ақыҭанхамҩаарыхыҩцәа рыдгыларазы апрограмма аԥаразоужьра 3,5-нтә рҟынӡа ишеизҳаз-150 млн мааҭ инаркны 500 млн мааҭ рҟынӡа.
