АЖӘАБЖЬҚӘА
сегодня 18:02
Аԥсны ахада Бадра Гәынбеи Урыстәылазегьтәи ауаажәларратә еиҿкаара «Деловая Россия» ахада Павел Титови реиԥылара мҩаԥысит
Аиԥылара ихы алаирхәит аиҿкаара «Аԥсны аус зуа ауаа» ахантәаҩы Роман Каҷараа.
«Ихарҭәаам ашықәс иалагӡаны хынтәуп ҳашәԥылоижьҭеи. Раԥхьа ҳаиԥылеит Аԥсны имҩаԥысуаз аекономикатә форум аҿы, иахьа еиҳарак гәахәарыла иазгәаҳҭоит апрактикатә усурахь ҳшиасхьо», — иҳәеит Бадра Гәынба, асас аԥсшәа иаҳәауа.
Атәыла ахада иазгәеиҭеит Урыстәылатәи иколлегацәа рзанааҭтә лшара шыҳараку, иҭабуп ҳәа реиҳәеит Аԥснытәи анаплакыҩцәеи дареи активла русеицуразы.
Бадра Гәынба иҭабуп ҳәа реиҳәеит хра злоу аусуреи ареспубликаҿы анаплакра аҿиара азҿлымҳареи рзы. Аҳәынҭқарра ахада инаҵшьны иазгәеиҭеит абизнес маҷи абжьаратә бизнеси рыдгылареи, иара убас уи аҿиаразы аҭагылазаашьақәа раԥҵареи Аԥсны аекономикатә суверенитет ашьақәыргыларазы акрызҵазкуа ахырхарҭақәа ируакны ишахәаԥшуа.
Бадра Гәынба агәрагара ааирԥшит ишьақәгылаз аимадарақәеи аҭаара апрограмма анагӡареи алҵшәа бзиа шрырҭо, ареспубликаҿы анаплакра аҿиара ишацхраауа.
Иганахьала Павел Титов иҳәеит аделегациа шааз Аԥснытәи рколлегацәа аус рыдуларазы. Иара иазгәеиҭеит аиҿкаара «Аԥсны аус зуа ауаа» аилазаара рылшарақәа шыҳараку, инаҵшьны дазааҭгылеит аганқәа аусеицуразы апроектқәа жәпакы шаздырхиахьоу.
Аделегациа раара апрограмма иаҵанакуеит ареспублика анапхгареи дареи реиԥыларақәа, анаплакыҩцәеи дареи реиҿцәажәарақәа, ақалақьқәа Аҟәа, Очамчыра, Гал, Тҟәарчал рҟны зымҽхак ҭбаау аинвестициатә тур амҩаԥгара.
