Аконференциа апленартә еилатәара мҩаԥысуеит Аботаника Аконференц-зал аҟны. Адныҳәаларатә ажәахә ҟаҵо аконференциа аҿы еизаз рҿаԥхьа дықәгылоит ААР апрезидент Зураб Џьапуа.  

Аконференциа аҳәаақәа ирҭагӡаны аус аулоит абарҭ  асекциақәа:

агуманитартә, асоциалтәии ауаажәларратәии анаукақәа,

афизика-математикатә наукақәа,

амедика-биологиатә наукақәа.

Абҵарамза 3 рзы аиубилеитә усмҩаԥгатәқәа рысасцәа Анаукақәа Ракадемиа анаукатә усбарҭақәа русура дырбахоит.

Агеографиатә наукақәа рдоктор, Урыстәыла Анаукақәа Ракадемиа апрезидиум алахәыла, Урыстәыла Анаукақәа Ракадемиа апрезидент ихаҭыԥуаҩ Геннади Матишови  агеографиатә наукақәа рдоктор, Урыстәыла Анаукақәа Ракадемиа Аладатәи анаукатә Центр адиректор инапынҵақәа назыгӡо Сергеи Бердникови напхгара зырҭо Урыстәыла Анаукақәа Ракадемиа Аладатәи анаукатә Центр ахаҭарнакцәа Аԥсны Аҭҵаарадыррақәа Ракадемиа иатәу аекологиа Аинститут иаҭаауеит.

Асасцәа рӷьырак Аҭҵаарадыррақәа Ракадемиа ақыҭанхамҩатә Институт иаҭаауеит, иара убас Аҭҵаарадыррақәа  Ракадемиа иатәу аексперименталтә патологиеи атерапиеи Ринститут аусура  дырбахоит.

Асасцәа рзы еиҿкаахоит Афон Ҿыц ахь аныҟәара.

Абҵарамза 4, 2022 шықәса рзы имҩаԥысуеит Аԥсны Аҭҵаарадыррақәа Ракадемиа аиубилеи иазку аныҳәатә еизара.  Аизара алагаанӡа асасцәа Аҟәа араион Алада Ешыра ақыҭан иҟоу Аԥсны Актәи Ахада Владислав Арӡынба Имемориал иаҭаауеит, анаҩс Анаукақәа Ракадемиа аҿаԥхьа иҟоу асквер аҿы аҵла еиҭарҳауеит.

Абҵарамза 4 рзы иазԥхьагәаҭоуп анаукатә усеицура азы жәларбжьаратәи аиқәшаҳаҭрақәа рнапаҵыҩра.