Аиԥылараан ирыхәаԥшын имҩаԥысраны иҟоу ареформа ахырхарҭа хадақәа, атәылауаа арратә маҵзурахьы рааԥхьара асистема аиӷьтәра, Арбџьармчқәа реиҭеиқәыршәара, иара убас атәылахьчара аусхк аҟны анорматив-зинтә база аиӷьтәра.

Атәыла ахада атәылахьчара аминистрра анапынҵа аиҭеит аамҭа кьаҿк иалагӡаны арратә уалԥшьеи арратә маҵзуреи рсистема аиӷьтәра иазырхоу азакәанԥҵаратә аԥшьгарақәа рпакет аздырхиарц.

Азакәан апроектқәа иазԥхьагәарҭозароуп Аԥсны Аҳәынҭқарра атәылауаа, хымԥада, арратә маҵзура рахысра, иара убас арратә уалԥшьа анагӡара аҽацәыԥхьакра иадҳәалоу азинтә хҟьаԥҟьақәа рышьақәыргылара.

Аҳәынҭқарра ахада инаҵшьны иазгәеиҭеит аҳәынҭқарратә маҵзурахьы адкылараан, иара убас азакәанԥҵара иазԥхьагәанаҭо даҽа ҭагылазаашьақәак рҿы арратә уалԥшьа анагӡара ҳасаб шазутәу.

Хазы анапынҵа ҟаҵоуп Арбџьармчқәа реиқәыршәара асистема аиӷьтәразы. Афицартә еилазаара ашьақәыргылараан ихадоу ахшыҩзышьҭра рыҭатәуп иқәыԥшу, еиҳа иазыҟаҵоу аррамаҵзурауаа. Иара убас, ареформа аҳәаақәа ирҭагӡаны иахәҭоу аррамаҵзурауаа ркатегориақәа рыла арратә маҵзура ахысра аҳәаа ақәра шьақәыргылатәуп.

Аҳәынҭқарра ахада анапынҵа ҟаиҵеит изыхәҭоу азакәан апроектқәа Жәлар Реизара – Апарламент ианаднакыла ашьҭахь, 2027 шықәса ажьырныҳәамза 1 инаркны амчра роуртә еиԥш ҳасаб азуны еиқәыршәазарц.

Ареформа аҳәаақәа ирҭагӡаны иара убасгьы иазԥхьагәаҭоуп Арбџьармчқәа реибашьратә еилазаара аҿиареи урҭ маҷ-маҷ ҳаамҭазтәи абџьари арратә техникеи рҿырԥштәқәа рыла реиҭеиқәыршәареи рзы ауснагӡатәқәа.

Уи адагьы аиԥылара алахәылацәа ишьақәдырӷәӷәеит ҳазҭоу ашықәс азы арратә ҽазыҟаҵарақәа рымҩаԥгара аплан.

Аҳәынҭқарра ахада иара убасгьы атәылахьчара Аминистрра анапынҵа аиҭеит цәыббрамза 30 рзы Аиааира Амш азгәаҭара иазку апарад аҽазыҟаҵара иалагарц.