Автобус аҭара иазкыз аныҳәатә церемониа рхы аладырхәит аҵара аминистр Хана Гәынба, уи лхаҭыԥуаҩ Хьыбла Шамба, Очамчыра араион ахада Алхас Кациа.

Хана Гәынба иазгәалҭеит ақыҭа школқәа рыдгылареи еиҵагыло абиԥара аҵара рҵарц азы иманшәалоу аҭагылазаашьақәа раԥҵареи аҵак ҷыда шрымоу.

«Ақыҭа ауаҩы алшарақәа рацәаны инаҭоит. Иахьа иҟаҳҵо зегьы шәареи шәԥеиԥши рзы ауп. Акыр иаԥсоу ашколхәыҷқәа ишәзеиӷьасшьоит адыррақәа рзы агәазыҳәара, шәхықәкқәа рынагӡара», – ҳәа инаҵшьны иазгәалҭеит аминистр.

Автобус ҿыц аҭара ақыҭа зегьы азы иззыԥшыз, акрызҵазкуа хҭысуп.

Араион ахада Алхас Кациеи, ашколхәыҷқәеи, урҭ рҭаацәеи ҭабуп ҳәа рарҳәеит Аҳәынҭқарра Ахада Бадра Гәынбеи, Санкт-Петербург агубернатор Александр Беглови, аҵара аминистрреи  иҟарҵаз ацхыраареи азҿлымҳареи рзы.

Араион анапхгаҩы ашколтә спортзал аремонт ишалаго азы адырра ҟаиҵеит,  хара имгакәа иахәҭоу аргыларатә маҭәахәқәа раахәара азԥхьагәаҭоуп. Иара убас, ԥхынгәымза анҵәамҭазы ашкол аҿы акрыфарҭа аиҭашьақәыргылара иалагоит. Иахәҭоу ашәҟәқәа зегьы хиоуп иҳәеит Кациа.