Ҳаҭыр зқәу ҳџьынџьуаа!

Иахьа ҳара иазгәаҳҭоит зегьы ҳзы акрызҵазкуа аныҳәа — зегьы бзиа иаҳбо ҳаҳҭнықалақь Аҟәа 2510 шықәса ахыҵра амш.

Ари, аиашазы, иуникалтәу рыцхәуп. Адунеи аҿы ирацәаӡам ас еиԥш ибеиоу, ижәытәӡатәиу аҭоурых змоу ақалақьқәа.

Аԥсны иқәынхо зегьы ҳзы Аҟәа ҳҳәынҭқарреи, ҳҭоурыхи, ҳкультуреи, Ҳаԥсадгьыл ахь иҳамоу абзиабареи ирсимволуп. Ара ҷыдала иуныруеит аамҭақәа реимадара, ара ажәытәи аҿатәи реинырра иабзоураны даҽакы иаламҩашьо ҳақалақь ссир ахаҿра аԥырҵоит.

Аҟәа ақалақь иаланхоит уи гәыкала бзиа избо, збаҩхатәреи зџьабааи рыла есҽны ақалақь аԥшӡара еихазҳауа аизҳазыӷьараҟны злагала ду ауаа.

Иацоуп аҳҭнықалақь ауааԥсыреи асасцәеи зегь реиҳа бзиа ирбо аҭыԥқәа ируаку аиҭашьақәыргылара ашьҭахь ирҿыцу аԥшаҳәа аартра аналыршахаз. Ари раԥхьа иргыланы, аҭыԥантәи ауааԥсыра рыԥсҭазаара аиӷьтәразы аҳәынҭқарра аҿаԥхьа иқәгылоу ауснагӡатәқәа ируакын. Ҳгәы иаанагоит уи қәҿиарала анагӡара алыршахеит ҳәа.

Агәра ганы сыҟоуп ҳаҳҭнықалақь макьана аиҭакра бзиақәа рацәаны ишазыԥшу. Атәыла анапхгара аринахысгьы Аҟәа ҳаамҭа иақәшәо, зҭоурых дуу, изыԥсоу аҳаҭыр ашьҭыхразы ирылшо зегь ҟарҵалоит.

Акыр иаԥсоу ҳџьынџьуаа!

Гәык-ԥсыкала ишәыдысныҳәалоит ҳаҳҭнықалақь Аҟәа лаша аиубилеи!»