1995 шықәсазы Ермолаи Аџьынџьал Д. И. Гәлиа ихьӡ зху Аԥсуаҭҵааратә Институт аҭоурых аҟәша анаукатә усзуҩыс дрыдыркылеит.  

Ермолаи Аџьынџьал Аԥсны Апарламент аҩбатәи ааԥхьара адепутутас дыҟан.

Уи илагала дууп аԥсуаҭҵаара аҿы, ахәҭакахьала, аҭыԥантәи ахыҵхырҭадырра аус аҿы. Икьыԥхьуп жәларбжьаратәи азин азҵаарқәа ирызкны Ермолаи Аџьынџьал инапы иҵыҵыз астатиақәа жәпакы.  

Анаукатә еилазаара аҿы ас еиԥш иҟоу аҭоурых ҭҵаарақәа рактуалра изныкымкәа иазгәарҭахьеит. Урҭ астатиақәа иреиуоуп «Аҭоурыхтә аԥсуаҭҵаара априоритетқәа рзы»  «Аԥсуа ҳәынҭқарразаара аҭоурых аҟынтәи», Аԥсны ақьырсианра аҭоурых аҟынтәи», «Аԥсуа реконкистеи жәларбжьаратәи азини», уҳәа убас егьырҭгьы.

Асовет аамҭазы ажурнал «Ажәытәӡатәи аҭоурых адырраҭара» аҿы икьыԥхьын уи еицырдыруа иусумҭа «Кавказ заавизантиатәи адипломатиа аспект азы». Астатиа «Аԥсуаа рҿы аиха акульт азы» ЮНЕСКО аԥшьгарала аиталиан, афранцыз, англыз, уҳәа абызшәақәа рыла атезисқәа раҳасабала Италиа икьыԥхьын.

Иҳаҩсыз ашәышықәса 60-тәи ашықәсқәа инаркны иара активла аԥсуа жәлар рмилаҭ-хақәиҭратә қәԥара далахәын. Асовет аамҭазы атәыла Иреиҳаӡоу анапхгара ахь идәықәҵахоз акыр зҵазкуа аполитикатә ажәахәқәа реиқәыршәара хаҭала далахәын. Иполитикатә гәаанагарақәеи активла инаигӡоз азинхьчаратә усуреи  рзы акыр ауадаҩрақәа дрықәшәахьан.

«Ахьӡ-Аԥша» III аҩаӡара орден ианашьоуп.