Андреи Хорошеи аҵыхәтәантәи имҩахь инаскьагара иазкыз ацеремониа рхы аладырхәит Аԥсны акультура аминистр Даур Ақаҩба, Аԥсны ажурналистцәа Реидгыла ахантәаҩы Руслан Ҳашыг, Аԥсны иҟоу Урыстәыла Ацҳаражәҳәарҭа ахаҭарнакцәа, Аԥсны Аҳәынҭқарратә музеи аусзуҩцәа, Андреи Хорошев иԥҳа Лизеи арежиссиор иҩызцәеи дыздыруаз ауааи.
«Иахьа ҳара наунагӡа абзиараз ҳәа иаҳҳәоит 20 мыш раԥхьа инаҳагӡараны иҟоу апроектқәеи еицырдыруа Аԥсны атәылауааи атәыла аҭоурыхтә баҟақәеи ирызкны иҭаҳхраны иҟоу афильмқәеи рзы ҳзыҿцәажәоз Андреи Хорошев. Иара иҳәалон зынӡа нхара Аԥсны даанкыларц шиҭаху. Убас иагьыҟалеит. Иара ҳтәыла гәыкала бзиа избаз, Аԥсны аҭоурыхи акультуреи рҿы зышьаҭа ду аанзыжьырц зҭахыз уаҩык иаҳасабала наунагӡа ҳгәалашәараҿы даанхоит», – ҳәа иҳәеит Аԥсны ажурналистцәа Реидгыла ахантәаҩы Руслан Ҳашыг.
Андреи Хорошев диит рашәарамза 29, 1959 шықәса рзы Москватәи аобласт аҿы. Уи деицырдыруа дҟалеит афильмқәа «Доктор Живаго», «Боец», «Адмиралъ» рҿы инаигӡаз арольқәа рыла. Актиор ифильмографиа аҿы иҟоуп 10 инареиҳаны акиносахьақәа, Андреи Хорошев ахәаԥшыҩ игәалашәараҿы даанхеит апсевдонимом «Андрей И» ала.
Андреи Хорошев изы Аԥсны аҭаара есымша иҷыдоу аҟазшьа аманы иҟан. Амҩадуқәа рҿы иумбар залымшоз аибашьра иаҭынхаз асахьақәа шырацәазгьы арежиссиор атәыла акультуратә проектқәа рынагӡара азы агәазҭазаара узҭо, ӷәӷәала уадзыԥхьало мчык амоуп ҳәа иԥхьаӡон.
Андреи Хорошев имҩаԥигоз апрограмма «Искатели» аҿы Аԥсны иазкны адокументалтә фильмқәа ԥшьба ҭыхын. 2025 шықәсазы Андреи Хорошев ҩаԥхьа Аԥсны даҭааит. Уи усҟан Аԥсныпресс аинтервиу аиҭеит. (https://www.apsnypress.info/ru/home/novosti/item/18655-andrej-khoroshev-v-abkhazii-est-zagadka-radi-kotoroj-stoit-rabotat).
Аԥсны иадҳәалоу ассоциациақәа рзы азҵаара аҭак ҟаҵо иара абас аҭак ҟаиҵеит:
«Маньчжуртәи абызшәа аҿы иҟоуп ажәак, уи «абзиаҟаҵара» ҳәа еиҭаугар ҟалоит. Араҟа, Аԥсны зегьы абзиара, ақьиара иадҳәалоушәа иҟоуп.
Аҵыхәтәантәи ашықәсқәа рзы арежиссиор иналукааша аҵарауаҩ, археолог, аполитикатәи ауаажәларратәи аусзуҩ Иури Воронов изку афильм аус адиулон.
