Ишаԥу еиԥш, аиубилеи – ари аихшьаалақәа рыҟаҵаразы аамҭа ауп, аха Алиса Шьалуа-иԥҳа илыдҳәаланы уахәаԥшуазар, уи лара лырҿиаратә идеиақәа рымҽхаки лмузыкатә ҟазара ауникалреи ахәшьара рыҭара азы ишьаху ҿыҵгоуп. Лара лырҿиаратә мҩа — ари ҩажәижәаба инареиҳаны аоператә партиақәа рсиа мацара акәӡам, ари адунеитә репертуар ахаҿсахьақәа ирнубаало акы иаламҩашьо, аԥсуа темперамент ашкол ауп.

Аҟәатәи амузыкатә ҵараиурҭа аҿы ишьақәгылаз, анаҩс Москватәи асценақәа рҿы ишәыз, зҽаазыртыз абжьы Аԥсни адунеитә театр дуқәеи еимаздаз музыкатә цҳаны иҟалеит. Ҩажәижәаба шықәса рыҩныҵҟа «Геликон-опера» аҿы лусура иалагӡаны Алиса Гыцба атрагедиатәи иналукааша аперсонажцәа – Џь. Верди иаԥҵамҭа аҟынтәи  Аида инладыркны Виолетта лҟынӡа,  П.И. Чаиковски иаԥҵамҭа аҿы Лизеи Татианеи рхаҿсахьақәа, уҳәа доусы акы иаламҩашьо иуникалу агәаартра рылаҵо зеиӷьаҟам ала иаалырԥшуан.

Артистка есымша дыҟан дагьаанхоит Лыԥсадгьыл ацҳаражәҳәаҩыс. Аԥсны жәлар рартистка ҳәа ахьӡи «Ахьӡ-Аԥша аорден  II аҩаӡара анаҩс, лара ареспублика аҿиараҿы ллагала есааира иазҳауеит. Лара иаԥылҵаз Жәларбжьаратәи аконкурс-лабораториа «Амузыка – абжьаӡареи аҳәаақәеи змам адиалог» («Музыка – диалог без расстояний и границ») аҭыԥантәи акультура аҿиареи аԥснытәи аопера аԥеиԥш лашеи рзы агәрагара символра азнауа,  абаҩхатәра злоу аҿар рзы акыр зҵазкуа платформаны иҟалеит. 

Аинформациатә Маҵзура Аԥсныпресс Алиса Шьалуа-иԥҳа лира Амш инамаданы гәык-ԥсыкала илыдныҳәалоит! Ҿыцәаара ақәымзааит лырҿиаратә мца, иналыгӡараны иҟоу ароль ҿыцқәа зегьы триумфны иҟалааит, лыбжьы хаа акәзар, есымша илызгәакьахаз «Геликон-опера» иҩныҩлааит, иара убас акыр шықәса гәыкала илзыҟоу лзыӡырҩцәа рзы игәыҟаҵагаха Лыԥсадгьыл иқәыҩлааит! Агәабзиара, агәамч, арҿиаратә гәазҭазаара ду, аԥсуа ишықәснҵыра ду Анцәа илаҭәеишьааит!