Аҟәа. Жьҭаарамза 18, 2022 шықәса. Аԥсныпресс. Жьҭаарамза 14 - 16 рзы Аҟәа ақалақь аҿы астолтә ԥкьаҭмпыл азы Аԥсны аклубтә чемпионат «Иреиҳаӡоу алига» аҩбатәи атур мҩаԥысуан, ҳәа иаанацҳауеит Аҿар русқәеи аспорти рзы аҳәынҭқарратә Еилакы апресс-маҵзура.
Ачемпионат рхы аладырхәит Аԥсны ақалақьқәеи араионқәеи, иара убас иреиҳаӡоу аҵараиурҭақәеи рҟынтәи аа-командак.
Актәи азеиԥшкомандатә ҭыԥ ааннакылеит Аҟәатәи акоманда (Ренат Карчаа, Лаша Давитаиа, Викториа Полушина), аҩбатәи аҭыԥ – Аԥснытәи аҳәынҭқрратә университет акоманда (Наур Карчаа, Нарт Ӡаԥшьба, Анна Егорова, Руслан Кешебиан), ахԥатәи аҭыԥ – Очамчыратәи аспортсменцәа (Алеқсандр Скиделло, Софиа Серафимова, Инал Сабекиа), аԥшьбатәи аҭыԥ ааныркылеит Ҭҟәарчалтәи акоманда (Мераб Абхазаа, Артиом Филимонов, Нинель Чалукиан).
Иара убас, ачемпионат аҳәаақәа ирҭагӡаны зымаха-зышьаха еибгам аинвалидцәа рыбжьара аицлабрақәа мҩаԥысит. Арҭ аицлабрақәа рҿы аиааира ргеит Џьон Ҷан-оглы (Гәдоуҭа), аҩбатәи аҭыԥ ааникылеит Алхас Амԥар (Пицунда), ахԥатәи – Мез Арџьениа (Гәдоуҭа).
Атурнир иреиӷьу ахәмарцәа ҳәа иалкаахеит Анна Егоровеи Мераб Абхазааи.
Акомандқәа ахраҿақәа, аҳаҭыртә шәҟәқәа, амедалқәа, аԥаратә ҳамҭақәа ранашьахеит.
Аицлабрақәа реиҿкаара рхахьы иргеит – Аҿар русқәеи аспорти рзы аҳәынҭқарратә Еилаки Аԥсны астолтә ԥкьаҭмпыл азы Афедерациеи.
Аӡбаҩ хада – ареспубликатә категориа змоу аӡбаҩ Руслан Сариан.
