Аилатәара рхы аладырхәит амедицинатә усбарҭақәа, ирласу амедицинатә цхыраара астанциақәа рнапхгаҩцәа, Ацентр аҳақьымцәеи агәабзиарахьчара Аминистрра апрофильтә специалистцәеи.  

Ареспубликатә хәышәтәырҭа аҳақьым хада инапынҵақәа назыгӡо Ерик Ҳаҭхәа иажәақәа рыла, иахьазы имҩаԥгоуп аԥҟарақәа 9, зегьы қәҿиарала имҩаԥысит.  

Аилатәара иалахәыз Ацентри араионтә хәышәтәырҭақәеи ирласу амедицинатә цхыраара астанциақәеи ҳәоуеиқәшәарала русеицура иаҵоу аҵакы ахадара азгәарҭон.

Ҷыдала ахшыҩзышьҭра аҭан акоронартә синдром змоу, мамзаргьы аинсульт зыхьыз апациентцәа ирласны,  амедицинатә цхыраара еиҳа аеффективра аналоу, «терапевтическое окно» ҳәа изышьҭоу аамҭа иҭагӡаны Ацентр ахь раагара алыршара азҵаара.

Иалацәажәеит иара убас ирласу амедицинатә цхыраара амашьынақәа ихымԥадатәиу ахәшәқәа рыла реиқәыршәара, иара убас иара Ацентр ахаҭагьы аԥҟарақәа рзы аныхтә материалқәеи иахәҭоу ахәшәқәеи рыла аиқәыршәара азҵаара.

«Аҟәатәи Ашьа-датә Центр аартра – ари Аԥсны агәабзиарахьчара асистема аҿиараҿы акыр зҵазкуа шьаҿоуп. Ҳара Аԥсны ауааԥсыра атәыла иалҵны имцакәа аҭыԥ аҿы ҳаамҭа иақәшәо ахәышәтәра роуртә еиԥш уи иааиԥмырҟьаӡакәа аусура азы ҳааидгыланы иахәҭоу аҭагылазаашьақәа зегьы аԥаҳҵароуп», – ҳәа иазгәеиҭеит  Едуард Быҭәба.