Анаҩс Аԥснытәи Ауниверситет ҳәа ишьақәгылаз Аҟәатәи апедегогикатә Институт иҷыдоу ароль анагӡара ақәын: атәыла иреиҳаӡоу аҵараиурҭа аҭыӡқәа рыҟны ахы цәырнагон, анаҩс аҿиарамҩа ианылон адгылара ӷәӷәагьы аиуон аԥсуа жәлар агәыӷра – амилаҭ-хақәиҭратә қәԥарала ахақәиҭреи ахьыԥшымра раиура. Уи аҵыхәтәаны аԥсуа ҳәынҭқарразаара аиҭашьақәыргылара иашьаҭаны иҟалеит.
Уи, ҳара ҳҳәынҭқарразаара, Аԥсны жәлар рџьынџьтәылатәи еибашьраан рхы иамеигӡа ирыхьчон Аԥснытәи аҳәынҭқарратә Университет аусзуҩцәеи астудентцәеи. Аӡәырҩы иахьатәи ҳамши ҳаԥсҭазаареи ҟаларц азы уи рхы ақәырҵеит. Арҵаҩцәа-аветеранцәа руниверситет гәакьа ахь ихынҳәны иахьа уажәраанӡа анаука амаҵ ауреи аспециалист ҿыцқәа еиҵагыло рабиԥарақәа рааӡареи иаҿуп.
Иахьа Ауниверситет аҿаԥхьа игылоуп аперспектива дуқәа, уи активла аҿиара иаҿуп, аинновациатә ҵарадырратә программақәа аланагалоит, анаука-ҭҵааратә проектқәа нанагӡоит, иԥхьагылоу урыстәылатәи анаука-ҵарадырратә центрқәа алархәны инарыгӡо апроектқәагьы уахь иналаҵаны, рааӡамҭацәа рзы ихымԥадатәиу адыррақәа рырҭоит.
Ҳара ҳҵарауаҩ ду, Аԥснытәи аҳәынҭқарратә Университет аректор Алеко Алеқсеи-иԥа Гәарамиеи иара ивагыланы аус зуа иколлегацәеи есымша иҳараку ахықәкқәеи ахыдҵақәеи раԥхьа идыргылоит, урҭ қәҿиаралагьы инарыгӡоит.
Ҳаҭыр зқәу аҩызцәа, ишәзеиӷьасшьоит азанааҭтә қәҿиарақәа, аихьӡара ҿыцқәа, агәабзиареи агәамчи аизҳазыӷьареи!
Уадныҳәалаз аиубилеи, иҳазгәакьоу ҳуниверситет!»
