Натан Реиес аԥыза-министр хаҭала иаԥшьгарала аԥсуа-қырҭуатә еибашьра аан хабарда ибжьаӡыз рыԥшаара азы аусура аиҭахацыркра арццакит ҳәа ҷыдала иазгәеиҭеит. Уажәы иарбоу ахырхарҭала Жәларбжьаратәи Аџьар Ҟаԥшь Амиссиеи иҷыдоу аҭагылазаашьақәа рзы Аминистрреи егьырҭ аԥснытәи аструктурақәеи активла аусеицура рыбжьоуп. Иара убри аамҭазы, амиссиа ԥыхьатәи ахада иажәақәа рыла, Жәларбжьаратәи Аџьар Ҟаԥшь Амиссиеи Аԥсны анапхгаратә усбарҭақәеи рыбжьара егьырҭ азҵаарақәагьы рганахьала аусеицура абжьаҵара азы ажәалагалақәеи аԥшьгарақәеи аус рыдулара мҩаԥысуеит.

Аԥыза-министр Натан Реиес иҭабуп ҳәа еиҳәеит Аԥсны иҟоу Жәларбжьаратәи Аџьар Ҟаԥшь Амиссиа ахада имаҵураҭыԥ аҿы хра злоу иусура азы.

Аофис анапхгаҩы ҿыц Родриго де Резенде аԥсшәа иаҳәо,  Алеқсандр Анқәаб аԥсуа ган амиссиа аус ацуреи иахәҭоу адгылара аҭареи ишазхиоу азгәеиҭеит.