Аҟәа. Жьҭаарамза 5, 2022 шықәса. Аԥсныпресс. Жьҭаара 5, 2022 шықәсазы имҩаԥысит Жәларбжьаратәи Женеватәи аиҿцәажәарақәа 56-тәи рраунд. Аиҿцәажәарақәа ирылахәын Аԥсны Аҳәынҭқарра, Аахыҵ Уаԥстәыла, Урыстәылатәи Афедерациа, ЕАА рхаҭарнакцәа, ЕЕи ЕАРи, ОБСЕи рыцхантәаҩлара.
Аԥсны Аҳәынҭқарра адәныҟатәи аусқәа рминистр ихаҭыԥуаҩ Иракли Ҭыжәба зхадараҿы дыҟаз аԥснытәи аделегациа иалахәын: Аԥсны АШәМ ахантәаҩы ихаҭыԥуаҩ Заал Хәарцкьиа, Аԥсны ААР аусзуҩцәа Лаша Аҩӡба, Артур Гагәылиа, Мадина Шамԥҳа.
Акраамҭа ашьҭахь имҩаԥысыз аиҿцәажәарақәа изаамҭанытәиу рраунд ҩ-усутә гәыԥк рформат ала имҩаԥысуан: ашәарҭадареи агуманитартәи зҵаарақәа рзы.
Аԥснытәи аделегация аҽазныкгьы ишьҭнахит амч ахамырхәараз ашәҟәы анапаҵаҩра азҵаара. Қырҭтәылатәи аган аҽазныкгьы мап ацәнакит ари аганахь ала адиалог амҩаԥгара.
Ашәарҭадара апроблема алацәажәараан Аԥснытәи аделегациа аҽазныкгьы агәҭынчмра аанарԥшит Қырҭтәыла арра-еибашьыга лшамҭа аизырҳара иахьаҿу.
Аԥснытәи аделегациа аҽазныкгьы аиҿцәажәарақәа раан ишьақәнарӷәӷәеит Гал ақалақь аҿы МПРИ аформат аиҭахацыркра ишазыхио. 2021 шықәсазы имҩаԥысуаз араунд аҟны Аԥсны ахаҭарнакцәа ари аформат аиҭахацыркраз ажәадгалақәа ҟарҵеит, аха арҭ аԥшьгамҭақәа ҭакда иаанхеит.
Аҩбатәи аусутә гәыԥ аҿы ирзааҭгылан агуманитартә зҵаарақәа.
Изаамҭанытәиу 57-тәи аиҿцәажәарақәа рраунд арыцхә макьаназ ишьақәыргылам, уи азҵаара иаартны иаанхоит.
