Аҟәа. Жьҭаарамза 2, 2022 шықәса. Аԥсныпресс. Жьҭаарамза 2 рзы Москваҟа, аофициалтә визитла инеит Аԥсны Жәлар Реизара-Апарламент аделегациа. Уи напхгара аиҭоит Аԥсны Жәлар Реизара-Апарламент Аиҳабы Лаша Ашәба. Аҳаирбаӷәаза Шереметиево аҟны аԥснытәи аделегациа дырԥылеит Урыстәыла Аҳәынҭқарратә Дума ахантәаҩы ихаҭыԥуаҩ Сергеи Неверов.
Аԥсны апарламенттә делегациа аилазаараҿы иҟоуп: Жәлар Реизара-Апарламент Аиҳабы ихаҭыԥуаҩ Асҭамыр Аршба, аграртә политикеи аԥсабаратә ресурсқәеи аекологиеи рзы апарламенттә Еилакы ахантәаҩы ихаҭыԥуаҩ Демур Гогиа, аҳәынҭқарра-зинтә политика азы апарламенттә Еилакы алахәыла Инар Гыцба, Жәлар Реизара-Апарламент Аппарат анапхгаҩы Вадим Бжьаниа.
Вадим Бжьаниа иҟаиҵаз адыррақәа рыла, авизит апрограмма инақәыршәаны иазԥхьагәаҭоуп Апарламент Аиҳабы Лаша Ашәбеи Аҳәынҭқарратә Дума ахантәаҩы Виачеслав Володини Афедерациа Ахеилак ахантәаҩы ихаҭыԥуаҩ Константин Косачиови реиԥылара.
Аҳаирбаӷәаза аҿы имҩаԥысыз аиԥылара ашьҭахь, Аԥсны Жәлар Реизара-Апарламент Аиҳабы иааԥхьарала Урыстәылатәи Афедерациа Аҳәынҭқарратә Дума ахантәаҩы ихаҭыԥуаҩ Сергеи Неверови аԥснытәи аделегациа иалахәызи Аԥсны Аҳәынҭқарра Аиааиреи Ахьыԥшымреи Рымшныҳәа иазкны Москватәи аԥсуа диаспора еиҿнакааз 62-тәи аиԥылара иаҭааит.
Аԥснытәи апарламенттә делегациа аофициалтә визит жьҭараамза 6 аҟынӡа имҩаԥыслоит.
