Аҟәа. Рашәарамза 19, 2025 шықәса. Аԥсныпресс. Гәдоуҭатәи араионтә хәшәтәырҭа хадаҿы имҩаԥгаз аиҭашьақәыргыларатә усурақәа рышьҭахь акомпиутертә томограф аусура иалагеит ҳәа аанацҳауеит Аԥсны Агәабзиарахьчара Аминистрра.
Аппарат Акоронавирустә ҿкы чымазара COVID-19 апандемиа аамҭазы уи иамаз аидара хьанҭа иахҟьаны иԥхасҭахеит. Амаруга шықәсыки бжаки раахыс аус ауӡомызт — уи арентген-мҩангага ԥхасҭахеит.
Аҳәынҭқарра Ахада Бадра Гәынба иҟаиҵаз адҵала атомограф аиҭашьақәырыгылареи уи иԥхасҭахаз ахәҭа аахәареи рзы ареспубликатә биуџьет аҟынтәи 11 миллион мааҭ азоужьын.
Акомпиутертә томограф КТ Aquilion CX 2020 шықәсазы акороновирустә ҿкы чымазара апандемиа аан аиҿкаара «Ҳара ҳаицуп» аҿы зҽеидызкызаз аԥснытәи абизнесуаа рыла иаахәан. Цәыббрамза 2, 2020 шықәсазы иара Гәдоуҭатәи араионтә хәышәтәырҭа Хада ахь инаган. Аппарат ашьақәыргылара иацыз ахарџь зегьы ахахьы иагеит амобилтә еимадара Аилазаара «А-Мобаил».
