Аиҿцәажәара рхы аладырхәит иара убас Тамбовтәи аобласт аекономикатәи аинвестициатәи аполитика аминистр ихаҭыԥуаҩ Ольга Камневеи Г. Державин ихьӡ зху Тамбовтәи Аҳәынҭқарратә Университет жәларбжьаратәи аусура азы апроректор Елена Зуевеи. Тамбови Аҟәеи ирыбжьоу аиқәшаҳаҭрақәа рҳәаақәа ирҭагӡаны аҩ-қалақьк акультуратәи аҵарадырратәи аусхкқәа рҿы аимабзиаратә еизыҟазаашьақәа рыбжьоуп.
«Иааит аамҭа аекономикатә еимадарагьы аҿиаразы. Агәра ганы сыҟоуп аҩ-ганк уи азы иахәҭоу апотенциал шамоу. Иарбоу ахырхарҭала аусеицура шьақәҳаргылароуп», - ҳәа иҳәеит Тамбов ақалақь ахада Максим Косенков.
Аҭаара аҳәаақәа ирҭагӡаны Аҟәа ақалақь аделегациа иалахәыз Асовет Еидгыла Афырԥҳәызба Зоиа Космедемианскаиа лбаҟа амҵан ашәҭ шьыҵәрақәа шьҭарҵеит, Тамбовтәи адоуҳатә семинариа иаҭааит, Тамбовтәи апарк аҿы еиҿкааз аныҳәатә еизара ахы аланархәит.
2012 шықәса раахыс Аҟәеи Тамбови аиашьаратә қалақьқәаны иҟоуп.
