«Ҳара ари аамҭа зегьы аҩныҵҟа урыстәылатәи ҳколлегацәеи ҳареи даара ибзиоу аусеицура ҳабжьоуп. Ҳара Урыстәыла аганахьала – аҵарадырратә усхкы инаркны Урыстәыла атеатралтә усзуҩцәа нагақәа рымадара аҟынӡа иҳауо адгылара даара пату ақәаҳҵоит, уи иаҵоу аҵакы ахадара еилаҳкаауеит». 

Иара иазгәеиҭеит урыстәылатәи аспециалистцәа аизыҟазаашьақәа рыбжьаҵара аганахьала ирымоу аԥышәа амадара дшазхиоу:

«Ҳара митәык зҽалызымкаауаз, ахәаԥшцәа рацәаны адзымԥхьалоз, зганахьала апрофессионалтә интересс маҷыз амаргиналтә театр аҟынтәи ҳалагеит. Уажәы Аурыс драматә театр Аԥсны атеатралтә еилазаара аҿы егьырҭ раԥхьа иҿыцу аидеиақәа аԥнаҵоит, қәҿиарала аӡыргарагьы мҩаԥнагоит. Ҳара ҳԥышәа аӡәыр аинтерес рызцәырнагазар гәахәарыла ирымаҳдоит».

Иқәгылара хыркәшо, Иракли Хьынҭәба зегьы ирыцку – аусеицура ацәымшәара, иаартны аусура ацәымшәара ауп ҳәа инаҵшьны иазгәеиҭеит. Акультура аусбарҭақәа рхала аидеиақәа рыдгалара мҩаԥыргалароуп, рколлегацәа рыҽрымардалароуп, аимадарақәа шьақәдыргылалароуп:

«Урыстәылатәи Афедерациа  – ари атеатралтә ҳәынҭқарра дуӡӡа ауп, ари атехнологиақәа, аԥышәа ахыҵкырҭа ауп, уи амилаҭтә уахь иналаҵаны, Аԥсны атеатралтә ҟазара еиҳау аҩаӡара ахь ашьҭыхра алшоит». 

Уи игәаанагарала, Аԥсны атеатралтә усзуҩцәа Реидгыла аԥҵара – ари хра злоу аидеиа ауп, аха уи инҭырҳәцааны аус адулара аҭахуп.

Уи иара убас иажәа иацҵо аусхкқәа зегьы рыла Урыстәылатәи Афедерациа аимадарақәа рырҭбаареи рыҿиареи рырӷәӷәареи иазырханы ишьақәгылаз атенденциа – ари даара аҵак ду змоу усуп ҳәа инаҵшьны иазгәеиҭеит:

«Ҳара хымԥада иҿыцу алшарақәа ҳхы иаҳархәоит», - ҳәа иҳәеит иара.