Аҟәа. Мшаԥымза 29, 2025 шықәса. Аԥсныпресс. «Аԥсуа жәабжьқәа» – аԥсуа шәҟәыҩҩцәа ражәабжьқәа реизга ауп. Уи аӡыргара мҩаԥысит мшаԥымза 23 азы Москва ақалақь, алитераторцәа Рыҩны Хада аҿы.
Ашәҟәы ҭыҵит Аԥсны ашәҟәыҩҩцәа Реидгылеи Аԥсны ашәҟәыҩҩцәа Рассоциациеи Урыстәыла арҿиаратә еидгыларақәа рҟынтәи аколлегацәеи ашәҟәыҩҩцәа реидгыларақәа Жәларбжьаратәи Реилазаареи амилаҭтә литературақәа адгылара рыҭара Апрограмма аҳәаақәа ирҭагӡаны имҩаԥысуаз русеицура иабзоураны. Иазгәаҭатәуп, Ашәҟәыҩҩцәа реидгыларақәа Жәларбжьаратәи Реилазаара ҩаԥхьа еиҭашьақәзыргылаз уи ахантәаҩы Иури Коноплианников ари аус аҿы илагала дууп.
«Аԥсуа жәабжьқәа» – ари зформат дуу, 700 бӷьыц инареиҳаны измоу, зеиӷьаҟам аполиграфиатә хаҭабзиара змоу шәҟуп. Уи ианылеит еиуеиԥшым абиԥарақәа ирыҵанакуа аԥсуа шәҟәыҩҩцәа аурыс бызшәахьы еиҭагоу рырҿиамҭақәа, иара убас аԥхьанатә аурыс бызшәала иҩыз ажәабжьқәагьы.
Аӡыргара аиҿкааҩцәа уи иҳараку аҩаӡараҿы имҩаԥысырц азы ирылшоз зегьы ҟарҵеит. Аныҳәа ибзианы имҩаԥысит! Аусуратә мшы шыҟазгьы, азал кәапеишәа иҭәын. Ашәҟәыҩҩцәа реидгыларақәа Жәларбжьаратәи Реилазаара ахантәаҩы Иури Коноплианников еизаз бзиала шәаабеит ҳәа реиҳәеит.
Владимир Делба иажәақәа рыла, ашәҟәы аԥхьажәа зҩыз Виачеслав Бигәааи егьырҭ иқәгылақәаз ашәҟәыҩҩцәа, ауаажәларратә усзуҩцәа зегьы Сергеи Антипов, Ольга Харламова, Сергеи Усков, Сергеи Берсенев, Сергеи Казначеев, Валери Баидин, уҳәа активла Аԥсны азы ргәаанагара рҳәон, уи акультура, раԥхьаӡа иргыланы алитература ирызцәырнаго ацәыныррақәа ирылацәажәон.
Аусмҩаԥгатә аиҿкааҩцәеи асасцәеи бзиала шәаабеит ҳәа рарҳәеит Урыстәыла иҟоу Аԥсны Ацҳаражәҳәарҭа абжьгаҩ Кан Ҭаниа, Москватәи аԥсуа диаспора анапхгараҭара ахаҭарнак Даур Барганџьиеи Адунеизегьтәи аԥсуа-база жәлар рконгресс ахаҭарнак Беслан Кобахьиа.
