Аҟәа. Мшаԥымза 2, 2025 шықәса. Аԥсныпресс. Аԥсны Аҳәынҭқарра Ахадас иалырхыз Бадра Гәынба ахаша, мшаԥымза 2 рзы, Аԥсны Жәлар Реизара адепутатцәеи Аԥсны Аконституциатә Ӡбарҭа аӡбаҩцәеи алархәны имҩаԥгаз ацеремониа аҿы ижәлар рҿаԥхьа аҭоуба шьҭеиҵеит.
Аҳәынҭқарра Ахада имаҵура иахагылара иазкыз аныҳәатә усмҩаԥгатә мҩаԥысит мшаԥымза 2, асааҭ 12:00 рзы Аԥсны Аминистрцәа Реилазаара акттә зал аҟны. Уи рхы аладырхәит азакәанԥҵаратәи, анагӡаратәи, аӡбаратә мчра ахаҭарнакцәа, Алхратә комиссиа Хада алахәылацәа, иара убас хыԥхьаӡара рацәала асасцәа.
Агәырӷьаратә ныҳәа иалахәыз ҳаҭыр зқәу асасцәа рыҩныҵҟа иҟан Урыстәылатәи Афедерациа Ахада Иадминтистрациа Анапхгаҩы актәи ихаҭыԥуаҩ Сергеи Кириенко, Алада - Уаԥстәыла Ахада Алан Гаглоев, Урыстәылатәи Афедерациа асубиектқәа Рхадацәа, Приднестровтәи Молдавтәи Ареспублика Ахаҭарнак, Аконституциатә ӡбарҭа Аӡбаҩцәа, Иреиҳаӡоу Аӡбарҭа анапхгара, Аԥсны Аминистрцәа Реилазаара, араионқәа русбарҭақәа рхадацәа, адинхаҵаратә конфессиақәа, аҭыԥантәи анапхараҭаратә усбарҭақәа рхаҭарнакцәа, уҳәа аҳаҭыр зқәу асасцәа.
Аныҳәатә усмҩаԥгатә аартуа Жәлар Реизара-Апарламент Аиҳабы Лаша Ашәба иҳәеит:
«Милаҭрацәала еилоу Аԥсны жәлар атәыла хра злоу аҿиареи атәылауаа рҭагылазаашьа аиӷьтәреи уаҵәтәи аԥеиԥш бзиа алыршареи рганахьала аусура шилшо агәра ганы далырхит Аҳәынҭқарра Ахада».
Лаша Ашәба иазгәеиҭеит Ареспублика Аԥсны Апарламент иқәыргылоу ахыдҵақәа, атәылауаа рзы акыр зҵазкуа аԥшьгарақәа зегьы рынагӡара иазку аусура аҿы Аҳәынҭқарра Ахада ивагыланы аусура ишазхиоу.
Аныҳәатә церемониа аҿы ҿыц иалху Аҳәынҭқарра Ахада Бадра Гәынба ареспублика Аконституциа инапы ақәҵаны аԥсуа бызшәала «аҭынчреи аҭышәынтәалареи рышьақәгылареи ижәлар реизҳазыӷьареи рзы имч-илша, идыррақәа зегьы дшамеигӡо» азы ижәлар рҿаԥхьа ҭоуба иуит. Бадра Гәынба ҭоуба иуит ԥхьаҟатәи иусура аҿы Ареспублика Аԥсны азакәанқәеи Аԥсны Аконституциеи дшақәныҟәало, ауаҩы изинқәеи ихақәиҭрақәеи, Аконституциеи Аԥсны азакәанқәеи, уи ажәларбжьаратә хыдҵақәеи рынагӡашьа дшырхылаԥшло.
Аҭоубашьҭаҵара ашьҭахь идырҳәеит Ареспублика Аԥсны Аҳәынҭқарратә гимн. Абри ашьҭахь Аԥсны Жәлар Реизара-Апарламент Ахантәаҩы Ашәба Лаша Аҳәынҭқарра Ахада Гәынба Бадра инапы иаиркит амчра атрибутқәа: аҳәынҭқарратә герб асахьеи «Аԥсны Аҳәынҭқарра Ахада» ҳәа аҩыреи зну амҳәыр, аштандарт, Аҳәынҭқарра Ахада Арбџьармчқәа рыдҵаҟаҵаҩ Хада иаҳасабала инаигӡо ароль аазырԥшуа аҳәа, аԥсуа лабашьа.
Аҳәынҭқарра Ахада иааркьаҿны ажәахә ҟаҵо дықәгылеит.
«Аԥсны Аҳәынҭқарра Ахада имаҵура сахагыло сара шьахәлаҵәҟьа еилыскаауеит исықәу аҭакԥхықәра атәы. Аҳәынҭқарра Ахада иаҳасабала, сара ихадароу зҵаараны сахәаԥшуеит ауаажәларра аҳәынҭқарра амчхарахь ирымаз агәарагара аиҭашьақәыргылара. Абри алыршахоит ламысцқьала, иаартны аусурала. Убри аҟнытә сара милаҭла, динхаҵарала, аполитикатә гәаанагарақәа, уҳәа рыла еилых ҟамҵаӡакәа, зегьы аполитикатә екстремизми аҳәынҭқарра аҿаԥхьа иқәгылоу егьырҭ ашәараҭарақәеи рҿагылараҟны ҳусеицура сшақәгәыӷуа асгәасҭарц сҭахуп. Раԥхьа иргыланы, ауаажәларра иддырбатәуп хымԥада азакәанреи азакәан аҿаԥхьа зегьы реиҟарареи рыпринципқәа рықәныҟәара!» - ҳәа иҳәеит Бадра Гәынба. – Адгылара ҳазҭо, ҳастратегиатә партниор хада – Урыстәылатәи Афедерациа ганрацәалатәи аус ицура арӷәӷәареи арҿиареи – Аԥсны адәныҟатәи аполитика ахырхарҭа хаданы иҟан, ус иагьыҟалоит.
Сықәгылара хыркәшо, Аҳәынҭқарра Ахада иалхрақәа ирылахәыз алхыҩцәа зегьы, неилымх ҟамҵакәа, иҭабуп ҳәа расҳәарц сҭахуп.
Иҭабуп ҳәа расҳәарц сҭахуп Алхратә комиссиа Хада, аокругтәи аҭыԥантәи акомиссиақәа рылахәцәа, анаԥшыҩцәа.
Иҭабуп ҳәа шәасҳәоит абри азал аҟны иҟоу зегьы аныҳәатә усмҩаԥгатә шәхы ахьалышәырхәыз азы.
Иҭабуп шәахьысзыӡырҩыз!»
Аҳәынҭқарра Ахада имаҵура ахагылара инамаданы Бадра Гәынба идныҳәалеит Урыстәылатәи Афедерациа Ахада Иусбарҭа Анапхгаҩы актәи ихаҭыԥуаҩ Сергеи Кириенко, Аахыҵ Уаԥстәылатәи Ареспублика Ахада Алан Гаглоев, Аԥсны иҟоу Венесуела ацҳаражәҳәаҩ Хесус Рафаель Саласар Веласкес, Аԥсны иҟоу Никарагуа ацҳаражәҳәаҩ, адәныҟатәи аполитикеи жәларбжьаратәи аизыҟазаашьақәеи рзы Никарагуа Ахада иабжьгаҩ-аминистр Альба Асусена Торрес Мехиа, иара убас Приднестровтәи Молдавтәи Ареспублика Ахада иабжьгаҩ Павел Прокудин.
