Аҟәа. Жәабранмза 7, 2025 шықәса. Аԥсныпресс. Аҳәынҭқарра Ахада инапынҵақәа назыгӡо Валери Бганба «Аҳазалхра-тарифтә еиҿкаара азы ауснагӡатәқәа рзы» Аусԥҟа инапы аҵаиҩит.
Асоциал-економикатә ҭышәынтәалара ашьақәыргыларазы, Ареспублика Аԥсны ахь импорт ҳасабла иаларгало атауарқәа, афатә аалыҵгьы уахь иналаҵаны, егьырҭ зда ԥсыхәа ыҟам атауарҵқәа рыхәԥсақәа иаалырҟьаны рышьҭыҵра алмыршара азы, иара убас амилаҭтә економика аҿиара азы иманшәалоу аҭагылазаашьақәа раԥҵара иазкны, Аԥсны Аҳазалхратә тариф аиҿкаара аҭышәынтәалара азы ажәалагалақәа реиқәыршәара иазырханы, жәабранмза 10 инаркны мшаԥымза 10, 2025 шықәсанӡа, Аԥсны аминистрцәа Реилазаара лаҵарамза 31, 2024 шықәса рзы иаднакылаз, ажьырныҳәамза 1, 2025 шықәсазы азинмчы зауз Ақәҵара № 68 апункт 3 ала Аԥсны Аҳазалхратә тариф иаланагалаз аиҭакрақәа рынагӡара аамҭала раанкылара азы Ақәҵара инапы аҵаиҩит.
Аҳәынҭқарратә ҳазалхратә Еилакы азԥхьанҵа аҭоуп мчыбжьык иахымгакәа Аԥсны Аминистрцәа Реилазаара азинтә шәҟәынҵақәа иарбоу аусԥҟа иашьашәало аҟаҵара азы ажәалагалақәа реиқәыршәареи рыдгалареи рзы.
Аекономика Аминистрреи Аҳәынҭқарратә ҳазалхратә Еилаки хәажәкырамза 24, 2025 шықәсанӡа Аҳәынҭқарра Ахада Иусбарҭа ахь еиқәыршәаны адгалара мҩаԥыргароуп:
– Аԥсны Аҳәынҭқарра аекономикатә интерессқәа ҳасаб азурала, Аҳазалхратә тариф Иаку Евразиатәи аекономикатә Еидгылара Иаку аҳазалхратә тариф ашьашәалара ашьаҭалагьы уахь иналаҵаны, Аԥсны Аҳәынҭқарра Аҳазалхратә тариф аиӷьтәра азы ажәалагалақәа;
– атауартә позициақәа рсиа (Ареспублика Аԥсны иахьаҵанакуа ахархәара зауа адәныҟаекономикатә усура Атауартә номенклатура иашьашәаланы).
