Аҟәа. Ԥхынҷкәынмза 26, 2024 шықәса. Аԥсныпресс. Аҿари аспорти русқәа рзы Аҳәынҭқаратә Еилакы аҟны ашықәсазтәи аспорт еихшьаалақәа ҟарҵеит, ииасуа ашықәс азы иреиӷьу аспортсменцәа, азыҟаҵаҩцәа, аӡбаҩцәа алыркааит.
Аспортсменцәа рыдкылара мҩаԥысит ԥхынҷкәынмза 26 рзы Аҿари аспорти русқәа рзы Аҳәынҭқаратә Еилакы аҟны. Аҳамҭақәа ранашьара ацеремониа рхы аладырхәит Аҳәынҭеилакы ахантәаҩы Ҭарашь Ҳагба, уи ихаҭыԥуаҩцәа Беслан Карчааи Роман Ҵкәуеи, Аҳәынҭқарра Ахада инапынҵақәа назыгӡо иабжьгаҩ Ахра Ашәба, Аԥсны Амилаҭтә олимпиатә Комитет апрезидент Валери Аршбеи жәларбжьаратәи акласс аспорт азҟаза, Асовет Еидгыла ачемпион, Европа ачемпион, аорденқәа «Ахьӡ-Аԥша» II, III аҩаӡарақәа ркавалер Рашь Хәытаба.
Урҭ аспортсменцәа реихьӡарақәа рыдырныҳәалеит ирзеиӷьаршьеит анаҩстәи аманшәалареи аихьӡара ҿыцқәеи.
Аҳамҭақәа ранашьахеит – сынтәа иреиҳау жәларбжьаратәи аицлабрақәа рылахәхара адагьы, уаҟа рҟазара аарԥшреи ашьақәырӷәӷәареи зылшаз аспортсменцәа.
Елҟан Гәазава атлетика хьанҭа азы Аԥсны иреиӷьу аспортсмен ҳәа дазхаҵоуп. Елкан атлетика хьанҭа азы Аԥсны аспорт азҟаза ҳәа ахьӡ ихуп. 2024 шықәсазы иара Урыстәыла ачемпионат аҿы араӡнытә аԥхьахә агара адагьы, Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аџьазтә аԥхьахә агарагьы илиршеит.
Инал Гаделиа аӡиудо азы Аԥсны ашықәс иреиӷьу аспортсмен ҳәа далккаахеит. Инал Ареспублика Аԥсны жәларбжьаратәи акласс аспорт азҟазаны дыҟоуп. 2024 шықәсазы уи Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аџьазтә аԥхьахә игеит.
Сандро Ҳаразиа амҵәышәмпыл азы Аԥсны ашықәс иреиӷьу аспортсмен ҳәа далкаахеит. Уи амҵәышәмпыл азы Аԥсны аспорт азҟаза ҳәа ахьӡ ихуп. 2024 шықәсазы Сандро Ҳаразиа Аԥсны дачемпионхеит, ачемпионат иреиӷьу аспортсмен ҳәа дазхаҵан, Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа ихы алаирхәуан.
Рахман Напиџьев самбо азы Аԥсны ашықәс иреиӷьу аспортсмен ҳәа далкаахеит. Рахман Напиџьев – самбо азы Ареспублика Аԥсны жәларбжьаратәи акласс аспорт азҟазаны дыҟоуп, Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аџьазтә аԥхьахә игеит.
Герман Арџьениа абокс азы ашықәс иреиӷьу аспортсмен ҳәа далкаахеит. Уи абокс азы Ареспублика Аԥсны жәларбжьаратәи акласс аспорт азҟазаны дыҟоуп. 2024 шықәсазы Герман Арџьениа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аиааира игеит.
Инар Кьетиа зхы иақәиҭу аиқәԥаразы ашықәс иреиӷьу аспортсмен ҳәа далкаахеит. Инар Кьетиа - зхы иақәиҭу аиқәԥаразы Аԥсны жәларбжьаратәи акласс аспорт азҟазаны дыҟоуп. 2024 шықәсазы иара аруаа рыбжьара адунеи ачемпионат аҿы аџьазтә аԥхьахә игеит.
Ҭемыр Исмоилов анапылампыл азы ашықәс иреиӷьу аспортсмен ҳәа далкаахеит. Темыр Исмоилов – анапылампыл азы Аԥсны аспорт азҟаз ҳәа ахьӡ ихуп, Урыстәыла ачемпионвт Иреиҳау Алига «Б» зхы алазырхәуа акоманда «Аԥсны» ахәмарҩны дыҟоуп. 2024 шықәсазы иара Гагратәи акоманда аилазаараҿы Аԥсны дачемпионхеит, ачемпионатә иреиӷьу ажәылаҩ ҳәа далкаахеит.
Рамазан Арапханов абырзен-римтәи аиқәԥаразы Аԥсны ашықәс иреиӷьу аспортсмен ҳәа далкаахеит. Аспортсмен абырзен-римтәи аиқәԥаразы Аԥсны жәларбжьаратәи акласс аспорт азҟазаны дыҟоуп. 2024 шықәсазы иара Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы араӡнытә аԥхьахә игеит.
Леон Габлиа астолтә ԥкьаҭмпыл азы Аԥсны ашықәс иреиӷьу аспортсмен ҳәа далкаахеит. Леон Габлиа - астолтә ԥкьаҭмпыл азы Аԥсны аспорт азҟазаны дазхаҵоуп.
Заур Ҭарба Аԥсны иреиӷьу ашьапылампыласыҩны дазхаҵоуп. Заур Ҭарба – ашьапылампыл азы МЕЛБЕТ-Актәи алига иалаху Владликавказтәи акоманда «Аланиа» ахьчабжа иоуп (ФНЛ).
Зхы иақәиҭу аиқәԥара азы Аԥсны ашықәс иреиӷьу азыҟаҵаҩ ҳәа далкаахеит Аԥсны амилаҭтә еизгоу акоманда азыҟаҵаҩ хада Ҭемыр Џьопуа, ашықәс иреиӷьу аӡбаҩыс далкаахеит урыстәылазегьтәии жәлабжьаратәи акатегориа аӡбаҩ, Ареспублика Аԥсны ҳаҭыр зқәу аспорттә аӡбаҩ, Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы абокс азы аицлабрақәа рыӡбаҩыс иҟаз Валериан Арлан.
Амилаҭтә спорттә хкқәа Рфедерациа апрезидент Адгәыр Гәынба аноминациа «Аиҭаҿиара» аҿы алауреатс дҟалеит.
Аԥсны зымаха-зышьаха еибгам аинвалидцәа рыбжьара ашьапылампыл-маҷ азы Аԥсны еизгоу акоманда алахәыла, ашьапылампыл-маҷ азы Жәларбжьаратәи атурнир «Аиааира Ахраҿа» аҿы аиааира згаз Роман Матиашов аноминациа «Амч ақәхара» аҿы алауретс дҟалеит.
«Ашықәс ақәҿиара» аноминациа аҿы алауретс дҟалеит Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аџьазтә аԥхьахә згаз Беата Аршба.
Абокс азы Европа ачемпионат араӡнытә аԥхьахәгаҩы Сандро Цымцба иҷыдоу аноминациа «Агәыӷра» ианашьахеит.
Ашықәс иреиӷьу аспортсмен ҳәа далкаахеит Герман Арџьениа, аспортсменка - Ерика Кәарҷиа.
Ҭемыр Исмоилов азгәыбылҩцәа рверсиа ала иреиӷьу аспортсмен ҳәа далкаахеит, абжьыҭира асоциалтә ҳа Instagram Аԥсны аҿари аспорти русқәа рзы Аҳәынҭқарратә Еилакы адаҟьа аҿы ԥхынҷкәынмза 12 инаркны 25-нӡа имҩаԥысуан. Зегьы адипломқәеи агәаларшәагатә сааҭқәеи ранашьахеит, иреиӷьу аспортсмен ҳәа иалкаахаз – аԥаратә ҳамҭақәа.
