Аҟәа. Абҵарамза 20, 2024 шықәса. Аԥсныпресс. Аҳәынҭқарра Ахада инапынҵақәа назыгӡо Бадра Гәынба аԥыза-министр актәи ихаҭыԥуаҩ, афымцамчи атранспорти рминистр Џьансыхә Нанба, аԥыза-министр ихаҭыԥуаҩ, аекономика аминистр Кристина Озган, аԥыза-министр ихаҭыԥуаҩ, афинансқәа рминистр Владимир Делба алархәны аусуратә еилатәара мҩаԥигеит.
Аԥыза-министр ихаҭыԥуаҩцәа напхгара зырҭо ахырхарҭақәа рыла аусура шцо азы адырра ҟарҵеит. Аилатәара аҿы иахьатәи амш азы еиҳа актуалра злоу, Урыстәылантәи акоммерциатә шьаҭала иаауа афымцамч азы ашәатәқәа ианаамҭоу рымҩаԥгара азҵаара иалацәажәеит, ҳәа адырра ҟанаҵоит Аҳәынҭқарра Ахада ипресс-маҵзура.
Уажәазы иаауа афымцамч азы ашәатәқәа ахәаша, абҵарамза 22 рҟынӡа ишәоуп. Џьвартәи аӡеизакырҭа аҿы иҟоу аӡы аҩаӡара азымхара инамаданы Егрытәи Аӡфымцвтә Станциа аҿы афымцамч агенерациа амҽхак алаҟәра иахҟьаны, ишьақәгылаз адефицит харҭәаахоит Урыстәылантәи акоммерциатә шьаҭала иаашьҭхо афымцамч ала.
Бадра Гәынба ҳтәыла ауааԥсыра фымцалашарада иаанымхарц азы анаҩстәи афымцамч ахәԥса ашәара иазку аԥаратә хархәагақәа реиқәыршәара иадҳәалоу аусура арӷәӷәара азы анапынҵақәа ҟаиҵеит.
