Аҟәа. Нанҳәамза 14, 2024 шықәса. Аԥсныпресс. Нанҳәамза 14 рзы Аԥсны Жәлар Реизара – Апарламент Аиҳабы Ашәба Лаша Аԥсны Аџьынџьтәылатә еибашьра ианалагаз аахыс 32 шықәса аҵра инамаданы Аԥсны жәлар рахь ааԥхьара ҟаиҵеит.
Ааԥхьара атекст аҟны иҳәоуп:
«Ҳаҭыр зқәу Аԥсны жәлар! Акыр иаԥсоу 1992–1993 шш. Аԥсны Аџьынџьтәылатә еибашьра аветеранцәа!
1992 шықәса нанҳәамза 14 рзы аибашьра ҳреспубликаҟны ҩнаҭацыԥхьаӡа инеит. Аԥсадгьыл ахьчаразы игылеит хәыҷгьы дугьы, ахацәа, аҳәса, абыргцәа. Зықьҩыла Аԥсны аҵеицәа рхы ақәҵаны Аԥсны Аҳәынҭқарра ахьыԥшымра, аҭынч ԥсҭазаара ҳзырыхьчеит.
Иахьа иаҳгәалаҳаршәоит 1992–1993 шш. Аԥсны Аџьынџьтәылатә еибашьраан абџьаршьҭыхла игылаз, атыл аҟны зымч-зылша иамеигӡа, аиааира арааигәара иацхраауаз зегьы. Наунагӡа ҳгәы иҭазаауеит, хьааны иҳацзаауеит ҳаԥсадгьыл ахақәиҭтәра зхы ақәызҵаз, аибашьраан ироуз ахәрақәа рҟынтәи аҭынч аамҭазы зыԥсҭазаара иалҵыз.
Аԥсадгьыл ахьчаҩцәа рфырхаҵара ҿырԥшы бзианы иҟазаауеит есқьынгьы абиԥара ҿыцқәа рзы».
